Maiatzaren 10ean, ostiralean, hogei bat elkartek eta sindikatuk deituta, kanpaldia egingo dute Gasteizko Plaza Berrian, gizarte bazterketaren aurrean Udalari neurri eraginkorragoak exijitzeko. Besteak beste, Plataforma de Derechos Sociales, Ongi Etorri Errefuxiatuak Araba, Salhaketa, Kaleratzeak STOP eta Wayra elkartea batu dira protestara, ELA, LAB, ESK eta Steilas sindikatuekin batera.
Gizarte zerbitzuetara bideratutako baliabideak eskasak direla eta, azken hilabeteetan, Gasteizen, kalean bizi diren pertsonak gero eta gehiago direla salatu dute deitzaileek, eta arazo horren aurrean Udalak erakutsi duen "geldotasuna" salatu nahi dute.
Kanpaldia 20:30ean hasiko da, eta ordu erdi beranduago batzar informatibo irekia egingo dute. 22:00etan, afari herrikoi autogestionatua egingo dute. Hurrengo egunean, maiatzaren 11n, prentsaurrekoa eta adierazpenaren irakurketa eta banaketa egingo dituzte. Salaketa kanpaina hasi besterik ez dela egin nabarmendu dute, eta etxebizitza eskubide bat dela aldarrikatzen jarraituko dutela ohartarazi dute, eta ez "espekulatzaileen negozio bat".