ADD UP! izeneko arkitektura eta ingeniaritza bulegoak aurkeztu duen azterketaren arabera, Gasteizko Arte eta Diseinuko Goi Eskolaren jarduera ederki egokitzen da Krea eraikinaren egungo egiturari, eta aldaketa gutxi batzuk eginez gero laster kokatu daiteke bertan. Izan ere, 2010. urtean eraberritu zuten Betoñuko komentuaren azpiegitura baldintza hoberenetan dago. "Halaber, amaitu ez zen proiektuetan diseinatutako altzairuak gorde dira".
Hala, arkitektoen arabera, programa guztia Krea eraikinaren beheko eta lehen solairuetan kokatu daiteke. Bigarren solairutik gora dauden espazioak –bost solairu ditu Kreak– libre geratuko lirateke beste erabilera batzuentzat, edo etorkizunera begira diseinu eskolak ikasketa programa handitu nahiko balu. "Eskolaren egungo erabilerak eta azalerak Kreara aldatzea bideragarria izateaz gain, heziketa-ziklo berriak ezartzea ahalbidetuko luke".
Eusko Jaurlaritzaren Hezkuntza sailak egindako eskari bati erantzunez egin du Gasteizko Diseinu Eskolaren kokatzeari buruzko azterketa Gipuzkoako arkitektura bulegoak; eta PPko legebiltzarkide Carmelo Barriok Eusko Legebiltzarrean eginiko galdera bati erantzunez zabaldu berri du arkitektoen txostena Cristina Uriarte sailburuak.
Alde batetik, Gasteizko Arte eta Diseinu Eskolak Zaramagan okupatzen duen eskola zaharrean eta ikasleek Krean erabilgarri izango dituzten metro koadroak alderatu dituzte arkitektoek aldaketaren egokitasuna nabarmentzeko –1.878 metro koadro dituzte oraingo eskolan, eta 2.644 metro koadro izango dituzte Betoñuko komentu eraberrituan–. Nabarmendu dutenez, egun eskolak irakaskuntzara zuzendutako espazioak ditu baina jarduerak gizarteratzeko eta kaleratzeko aukerarik ez dute.
Halaber, Krearen kanpoko itxurari eta izaerari heldu die ADD UPP! arkitektura bulegoak aldaketaren egokitasuna argudiatzeko. Arkitektoen ustetan, irudiak eta diseinuak balore gero eta handiagoa duten gizarte batean "onartezina" da Gasteizko Arte eta Diseinu eskola egun dagoen eraikinean jarraitzea. Horregatik Kreara aldatzeko erabakia "ezin egokia" dela uste dute. "Azpiegitura kulturala bezala eraiki zen Krea, irakaskuntza-espazio desberdinekin, ikasleen egoitza, erakusketa eta ekitaldi aretoak…; eta halaber irudi formal biribila duen ikonoa bilakatu da, aldi berean xumea eta igar daitekeena. Erakusgarritasunak gaur egun ez duen ikusgarritasuna emango dio eskolari".
Arkitektura bulegoaren arabera, eraikinaren espazioen banaketa eta distribuzioa aurrerago egin beharko litzateke Diseinu eta Arte Eskolarekin elkarlanean.
