Igandean goizean lan istripu larria izan zuen Michelin enpresako langilea gaur hil da. Koma induzitua eragin zioten ospitalean, baina ezin izan du aurrera egin. 43 urteko Antonio Miguel Parra da lan istripuen azken biktima.
Sindikatuek adierazi dutenez, egosketa-prentsa batean lan bat egitera zihoan gizona, hainbat metroko altueran. Plataforma igogailua prestatzen ari zela, harrapatuta geratu zen, makinaren eta hesi baten artean. ESKk azaldu duenez, "istripuaren tokia estua eta maniobratzeko zaila da". Sindikatuko hainbat ordezkari "segituan" bertaratu ziren, eta gertatutakoa ikertzen hasi ziren. Langileen ordezkarien esanetan, bihar bilduko dira enpresarekin, "istripua eragin zuten arrazoiak argitzeaz gain, beharrezkoak diren neurri prebentiboak hartzeko".
