Sugar Kultur Fest jaialdiaren bueltan 50 ekimenetik gora izango dira igandetik

Mirian Biteri 2018ko api. 12a, 09:39

Kontzertu edo hitzaldiez gain, Ozetan egingo den Harrikada!, Arabako musika elektronikoaren jaialdia, edo Cristina Bereziartuaren Xuxurlatuz-Gasteizko Oroimena proiektua aurkeztuko dira.

 

Hilaren 15etik 22ra bitartean, 50 kultur ekimenetik gora egingo dira Gasteizko Judimendi auzoan. Igandean bertan, Artearen Nazioarteko Egunean, artea kalera aterako dute. Besteak beste, JotaFa taldearen kalejira; Lumen eta Fast taldeen kontzertuak; Fast grafitigilearen emanaldia; Beatriz Perales, Marina Suárez eta Sara Berasaluce artistek arte hibridazio saioa izango dira. Horrez gain, auzoko artistek beraien areto eta estudioak zabaldu dituzte; Txaro Arrazola, Ines Gonzalez de Zarate, Eduardo Alsasua, Natalia Albeniz eta Irantzu Lekuek parte hartuko dute 18:30ean, Sefarad Plazatik aterako den ekimenean.

Baina igandeko jardueretaz gain aste osorako ekimenak prestatu dituzte Judimendin. Tartean, sakelekoekiko dependentzia salatzeko zoombie zita antolatu dute EonCult elkartetik, sormen idazketa tailerrak, abesbatzekin hitzordua, auzoko nagusiekin ibilbide kulturala auzoko gune esanguratsuenak ezagutzeko, AEK-k antolatutako txiste txapelketa, Vasco Navarro trenaren inguruko dokumentala, Ahoz aho horma irudi parte hartzailea edo sukaldaritza beganoa ezagutzera emateko tailerrak antolatu dituzte, hitzaldi, kontzertu edo poesia emanaldiekin batera.

Esan bezala, jaialdian datozen hilabeteotan garatuko diren proiektuak ere aurkeztuko dira; tartean, Harrikada!, Ozetako GaraiONen egingo den Arabako musika elektronikoaren eta arteen jaialdia, Cristina Bereciartuaren Xuxurlatuz-Gasteiz Oroimenak proiektua edo Mario Paniego (Amurrio, 1978) artistaren ARTgia beka.

Erlazionatuak

Sugarra piztu nahi dute

Erredakzioa 2018 mar 20 Gasteiz

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide