Dagoeneko lekua hartu dute Olentzerok eta Mari Domingik Florida parkean. Zehazki, Uraren Ezkutuko Lorategian kokatu dituzte bi irudiak, Floridako jaiotzaren metro batzuetara, eta etxola bat izango dute. Gainontzeko jaiotzaren itxurarekin guztiz bat ez datozenez, beste toki batean jartzea erabaki dute. Bestetik, Gorka Otsoa de Alda y Angulo izan da obraren egilea.
Pertsonaia berriak ikusi nahi dituztenak iturriaren ondoko ateetatik sartu beharko dira lorategian; izan ere, ez daude oso ageriko leku batean kokatuta. Era berean, irudien ondoan bi zaku daude; bertan utzi ahal izango dituzte gutunak haurrek, 10:00etatik 21:30era bitartean. Jaiotza gaur bertan estreinatuko da.
