Komunitate musulmanak otoitz-etxe berri bat irekitzeko lizentzia eskatu du Zabalganan, Mariturri bulebarraren 20. zenbakia eta Oion kaleko 51. eta 53. atariak hartzen dituen lokal batean. Bertara eraman nahi dute gaur egun Ariznabarrako Mediterraneo hiribidean kokatuta dagoen meskita, orain arte elkarbizitza arazorik gabe funtzionatu duena. Irekiera horren aurrean, gutun anonimo bat zabaldu zuten ezezagun batzuek aste hasieran, eta berehala erantzun zuen Zabalgana Batuz auzo elkarteak, elkarbizitzarako deia zabalduz.
Auzo elkartearen hitzetan, 23.000 biztanle dituen auzo berria "zabala, plurala eta anitza da, klutur anitzeko jendea biltzen dituena eta topaguneak behar dituena". Hezkuntza, osasuna, kultura eta gizarte eragileen sarean "elkarbizitza eta integrazioa" nagusitzen direla nabarmendu dute, eta "jarrera arrazistak eta xenofoboak" onartezinak direla adierazi.
Egunotan zabaldutako sinatu gabeko gutunak "ez du auzoa ordezkatzen", eta, Zabalgana Batuz elkartearen esanetan, jarrera arrazisten aurkako erreakzioak piztu dira, "auzoaz harro egoteko modukoak".
Musulmanen integraziorako Al Indimay elkarteko ordezkariek ere euren iritzia eman dute komunikabideetan, eta azpimarratu dute meskita irekitzeko "arau guztiak betetzen" ari direla eta haien aldetik "egunero lanean" ari direla integrazioaren alde.
Udala, bere aldetik, alde ezberdinen arteko bitartekaritza egiteko prest agertu da, "eskubide eta betebehar guztiak beteko direla ziurtatzeko eta elkarbizitza bermatzeko".
Guztira, 13 meskita daude Gasteizen, eta Koroatze auzoan beste bat irekitzeko lizentzia eskaera egin du musulmanen komunitateak. Mariturrikoa ere laster ireki dezakete, Udalak lokalak baldintza guztiak betetzen dituela baieztatzen duenean.
