Raul Garcia Ezkerro Guardiako alkate berria da, EAJ eta EH Bilduren akordioari esker

Raul Garcia Ezkerro (EAJ) 28 urterekin izango da alkate berria. / Argazkia: LAGUARDIA.eus

Lucio Castañedaren dimisioaren ostean, 28 urteko Raul Garcia Ezkerro alkateordeak ordeztu du. EAJk eta EH Bilduk mediku kontsultategi berria, etxebizitza babestuen programa bat eta A-124 errepidearentzako irtenbidea adostu dituzte.

Joan den astean, Guardiako alkate Lucio Castañedak dimisioa eman zuen, arrazoi pertsonalak eta gobernu barruko desadostasunak zirela eta.

Horren ostean, akordio batera iritsi dira EAJ eta EH Bildu: alde batetik, subiranistek EAJko Raul Garcia Ezkerro alkate berriaren inbestidura ahalbidetu dute; bestalde, jeltzaleek hainbat konpromiso hartu dituzte legealdiaren amaierari begira.

Raul Garcia Ezkerro, 28 urteko alkate berria, Kultura, Herritarren Partaidetza eta Berdintasun Saileko zinegotzia eta bigarren alkateordea izan da azken urteetan.

EH Bilduk prentsa ohar batean iragarri duenez, honako hauek dira hurrengo udal hauteskundeen aurretik markatutako lehentasunak:

  • Informazioa, gardentasuna eta komunikazioa hobetzeko mekanismoak abian jartzea, bai gobernu taldearen barruan, bai udalerriko herritar guztiei begira.
  • A-124 errepidearen behin betiko konponbidea lortzea, bai zeharbidean, bai bidegurutzean, herritarren segurtasuna bermatzeko.
  • De la Barbacana izeneko lursailak bere jabari osoan izateko behin betiko irtenbidea, eta espazio horretan osasun zentro berri bat eraikitzea.
  • Etxebizitza babestuko programa bat bultzatzea, Guardiako biztanleak finkatzeko eta gazteei nahiz sektore ahulenei etxebizitza duin bat eskuratzeko aukera bermatzeko.
  • 2010. urtean Peñentzako diru-laguntzen inguruan sortutako egoerari behin betiko irtenbidea.
  • Udalerriko landa-bideak hobetzea eta mantentzea.
Erlazionatuak

Guardiako alkateak dimisioa eman du, gobernu barruko desadostasunak direla eta

Arabako Errioxa Guardia

Gobernu taldearen barruko desadostasunak eta arrazoi pertsonalak argudiatuta, dimisioa eman du Lucio Castañeda (EAJ) Guardiako alkateak. EH ...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide