Sarri zabaltzen dira etorkinen inguruko zurrumurruak. Estereotipoetan oinarritu ohi diren uste faltsu horiei aurre egiteko bide desberdinak jorratzen ari dira Euskal Herriko hainbat herritan. Datuetan oinarritutako informazioa, kanpotik etorritakoaren kultura hobeto ulertzeko ekimenak, edota boluntarioek osatutako sareak dira bide horietako batzuk.
Oiondarrek bide berria urratu dute. Musika hizkuntza unibertsala dela esan ohi da, eta jatorrizko 20 nazionalitate baino gehiago biltzen dituen herri batean doinua izan daiteke "besteari" hobeto ulertzeko tresna bikaina. Ideia horretatik abiatuta, elkarrekin kantatzeari ekin diote.
Egoerari buelta
Ongi ondutako ardoarekin gertatzen den moduan, horrelako ekimen batek mamitzeko denbora behar izan du. Duela bi urte erabaki zuten Bitartean Jolasean elkarteko kideek etorkinen inguruan zabaldutako pertzepzioari buelta eman behar zitzaiola. Egitasmo parte-hartzailea martxan jartzea erabaki zuten, eta Artehazia elkartearen laguntzarekin, Komanditario Berriak taldea sortu zuten.
Idoia Zabaleta artistaren bitartekaritzarekin, eta Mursegorekin batera (Maite Arroitajauregi), oiondar ugarik parte hartu dute egitasmoan: musulmanak, herriko abesbatzak, musika eskolako irakasleak eta ikasleak, bertsolariak, gazte asanblada, Eh Mertxe! rock taldea… guztira, ehun bat lagun inguru batu dira proiektuan.
Elkarlanaren emaitza entzuteko aukera dago orain, zortzi kantuz osatutako %100 Oion diskoan. Estilo desberdinak erabiltzen dira bertan, munduan eta Oionen dagoen aniztasunaren isla.
Gaiei dagokienez, herriko zurrumurruak, kexak edo bizikidetza bezalako kezkak jorratzen dira abestietan. Diskoan agertzen diren letrak eta musika osatzeko ezinbesteko laguntza izan dute ere: Aida Torres, Txap, P3z, Amorante eta Harkaitz Canorena, besteak beste. Guztiek haien ekarpena egin dute.
'Pertzepzioa', datuetan
Eustat Euskal Estatistika Erakundeak udal erroldaren arabera jasotako informazioan zehazten denez, 2016ko datuei erreparatuz, Oionek 3.427 biztanle ditu. Horietatik, %44 (1.538) Euskal Autonomia Erkidegoan jaiotakoak dira, eta %41 (1.437) Nafarroan edo Espainiako lurralde batean. Gainerako %13 (452) beste estatu batean jaiotakoak dira.
Arabako datuekin alderatuz, portzentajeak hauek dira, hurrenez hurren: %65 (EAE), %23 (Espainia, Nafarroa barne) eta %10 (atzerria).
