Bibat museoak Beste Eklipsea. Warren De la Rue erakusketa hartuko du uztailaren 18tik urriaren 18ra bitartean. Ekimena datorren abuztuaren 12ko eklipseak sortutako ikusminaren harira antolatu dute, eta 1860ko eguzki eklipse historikoari begirada bat proposatzen du; izan ere, gertaera hark nazioarteko ikerketa astronomikoaren erdigunean kokatu zuen Araba. Garai hartan, uztailaren 18an zehazki, Britainia Handiko espedizio garrantzitsu bat iritsi zen lurraldera, eta behaketa guneak ezarri zituen hainbat txokotan, hala nola Ehari, Anda, Pobes, Urizaharra, Hereña, Laudio eta Guardia herrietan, Toloño mendilerroan edota Gasteizko Santa Luzia gainean. Azken honetan, gaur egun, monolito oroigarri bat dago Astronomo kalearen ondoan, gertaera hura gogoratzeko.
Espedizio horren barruan Warren De la Rue astronomo britainiarra nabarmendu zen. Zientzialari honek behatoki eramangarri bat jarri zuen Ribabellosan, eta bertatik eguzki eklipse baten lehen argazki serie osoetako bat lortzea lortu zuen, behaketa zientifikoaren garapenean modu erabakigarrian lagunduz. Hain zuzen ere, erakusketa Bibaten egiteko arrazoia astronomoaren familia lotura da: museoko bildumak De la Rue karta enpresaren funtsak gordetzen ditu. Enpresa hori Thomas De la Ruek, astronomoaren aitak, sortu zuen, eta kartak inprimatzeko munduko konpainia garrantzitsuenetako bat bilakatu zen.
Erakusketak Warren De la Ruek berak sinatutako jatorrizko zirriborro bat biltzen du, baita karta sorta historikoak eta karta astronomikoak ere, zientziaren, artearen eta industriaren arteko lotura estua agerian utziz.
