Hiru pertsona ikertzen ari dira Durako Ikasbidea Ikastolako eta Iruña Okako institutuko adingabeei, ikasturte amaierako bidaian, sexu abusuak egiteagatik. Guardia Zibilak Europa Press berri agentziari jakinarazi dionez, Ertzaintzak zein Guardia Zibilak jaso dituzten hamar salaketekin zerikusia dutelakoan ikertzen ari dira hiru gizonak.
Bi ikastetxeetako ikasleek Mediterraneoan egin duten itsas bidaia batean gertatu dira sexu abusuak. Ikasle batzuek beren familiei jakinarazi zieten susmatzen zutela beste bidaiari batzuek alkohola eta drogak eman zizkietela eta, konortea galduta, ukituak egin zizkieten. Guardia Zibila ikertzen ari da gizon horiek substantziaren bat bota ote zuten ikasleen edarietan.
Bi salaketa maiatzaren 6an aurkeztu ziren Gasteizko Ertzaintzaren egoitzan, eta beste zortzi, Bartzelonan, itsasontzia porturatu zenean. Biktimak 15 eta 16 urte artekoak dira.
Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.
