Familien kezkatik sortu zen Altxa Burua herri ekimena, eta gaur, 20.000 bazkide baino gehiago bildu dituenean, elkarte gisa formalizatzea erabaki du Araban, Bizkaian eta Gipuzkoan.
Altxa Buruak hiru helburu nagusi izan ditu sortu zenetik: lehen smartphonea eskuratzeko adina atzeratzea —adin txikikoek beharrezko heldutasuna garatzeko eta erabilerari lotutako heziketa ulertzeko denbora izan dezaten—; smartphonerik gabeko hezkuntza inguruneak sustatzea; eta osasun irizpideetan eta ebidentzia zientifikoan oinarritutako digitalizazio arduratsua bultzatzea, adin txikikoei ahalduntze digitala emango diena eta, aldi berean, familiei eta hezitzaileei teknologiaren erabilera kontzientean lagunduko diena.
Familiak, ikastetxeak
Elkarte berriak ohar bidez iragarri du elkarte gisa eratu izanak "sare lana sendotzea" ahalbidetuko duela, "hezkuntza erakundeekin eta administrazio publikoekin elkarlana indartzea, eta familientzako hitzaldiak, tailerrak eta baliabideak sustatzen jarraitzea". Gaur egun, familiez gainera, ehun ikastetxe inguruk bat egin dute Altxa Buruarekin. Horrez gain, medikuen elkargoek, foru aldundiek eta hainbat gizarte eta hezkuntza erakundek babesa agertu diote proiektuari, haren izaera komunitarioa eta zabala indartuz.
"Familia askok smartphonea gero eta lehenago emateko presio soziala sentitzen duten testuinguru honetan, Altxa Buruak erakutsi du komunitateak elkarlanean jarduten duenean presio hori arindu edo irauli daitekeela. Euskal Herriko hainbat herritan, DBHko 1. eta 2. mailako ikasleen ehuneko handi batek ez du smartphonerik, eta horrek ingurune osasuntsuagoak sortzen laguntzen du, baita ikaskideen arteko egiazko harremanak sustatzen ere", adierazi dute.
Logo berria
Aldi berean, gizarte mugimendu berriak bere logoa aurkeztu du, etapa berriari irudi berritu batekin ekiteko. Logo berriak mugimenduaren balio nagusiak irudikatu nahi dituela azpimarratu dute: begirada altxatzea, komunitatea indartzea eta nerabezaro libreago, gizatiarrago eta osasuntsuago baten alde egitea. Diseinu berriak, halaber, batasuna, itxaropena eta konpromezu kolektiboa islatzen ditu".
