Kasurako, Bagoetan (Arratzua-Ubarrundia) eta Gasteizen bertan aurkitu dira Erdi Aroan burdina lantzeko lehen azpiegiturak. Burdinolen kasuan, Aiaraldean, Gorbeialdean eta Araia inguruetan bereziki ekoitzi izan dira metalak. Baina herri gehienetan egon dira, ia-ia gaurdaino, maila txikiagoan metalekin lan egin duten errementariak, etxebizitzetarako zein nekazaritza gailuetarako nahitaezkoak zirelako.
Garai batean oso lanbide errentagarria izan zen, eta, gainera, lehen momentuan bederen inbertsio larriegirik ez zuen zerbait izan zen: labe bat eskura izanda, mailua, ingudea eta suhatzak baino ez ziren behar gainerako tresna espezializatuak sortzeko, Luis Padura errementari ospetsuak gogora ekarri duenez. Baina forjaketaren inguruko sekretuak askotan familia edo klanaren barruan geratu dira, eta sarri kondairez apaindu izan dira, metal on baten atzean zegoen teknika zehatza zabaldu ez zedin. Alabaina, horrek bestelako ondorioak ekarri zituen bueltan, aprendizik izan ezean, errementaria hiltzean, harekin joaten baitzen ezagutza preziatua.