Azken urteetan sare sozial komertzialek hartu duten norabidea dela eta, Tokikomek kezka agertu du desinformazioa, eskuin muturreko interesen defentsa eta erabiltzaileen osasun mental eta fisikoaren gaineko kalteak gero eta nabarmenagoak direlako. Kari horretara, Tokikomek uste du sare sozialek gizartean eragin handia dutela eta eragin hori positiboa izan behar dela. Hortaz, euskarazko 78 toki hedabide biltzen dituen elkarteak Goazen, lagunok! kanpainarekin bat egin du. Mugimendu horrek animatzen ditu herritarrak sare sozial komertzialak uztera eta Fedibertso izenekora batzera. Zerbitzari interkonektatuen sare deszentralizatua da hori —X, Bluesky edota Threads sare sozial komertzialen alternatiba den Mastodon da horren adibide ezaguna—. Tokikomek aldarrikatu du fedibertsora joatea aukera ona dela herritarrentzat, sare sozialetan modu etikoagoan eta komunitarioagoan parte hartzeko. "Tokikomen uste dugu sare horietan jarraitzeak albo-kalte horien konplize izatea dakarrela, eta ez dugu gurpil hori elikatzen jarraitu nahi", adierazi du elkarteak, ohar batean.
Putzu toxikoak
"Sare sozial komertzialak, jendearentzako komunikazio tresna gisa sortu zirenak, gero eta putzu toxikoagoak bilakatzen ari dira. Atzetik dauden multinazionalen diru gosearen ondorioz, desinformazioa hedatzeko, giza talde ahulenei eraso egiteko eta eskuin muturreko mezuak haizatzeko makina erraldoiak" bilakatu direla adierazi du tokiko hedabideen elkarteak. "Sare horiei eman diegun eragin ahalmen izugarriak ondorio zuzenak eragiten ditu jadanik mundu osoko giro sozial eta politikoan".
Sare sozial irekietan duten presentzia gero eta handiagoa izango dela diote
Teoriara mugatu ez eta jauzi praktikoa egin du elkarteak. Hala, hiru erabaki hartu ditu. Lehenik, sare sozial komertzialak elikatzeari uzten joatea, eta aldi berean, hedabideetan duten presentzia murrizten joatea. Bigarrenik, sare sozial irekietan parte hartzea, TKM.eus zerbitzari propioarekin, beste era bateko sare sozialak elikatzen eta indartzen joateko. Hirugarrenik, jarraitzaile, irakurle eta ikus- entzule guztiak euren sare sozialetako jarduna Fedibertsora eraman dezaten animatzea, aipatutako #goazenlagunok kanpainarekin bat eginez.
Zerbitzari propioa
TKM.eus zerbitzariari dagokionez, duela hainbat aste jarri zen martxan, eta ALEAk ere bertan aterpe hartu du. Baina, alde praktikoari begira, Mastodon sare sozialaren bidezko jarraipena egin dakioke ALEAri. Aldea da TKM zerbitzarian Tokikomeko komunikabideak eta profesional zein kolaboratzaileak soilik erregistratu ahal izango direla, Erresuma Batuko BBC hedabideak martxan jarri duen adibideari jarraiki. Erabaki horren helburua "euskarazko zero kilometroko informazio iturri fidagarria" eskaintzea da, Tokikomen esanetan. Hots, hedabideek eta kolaboratzaileek ziurtatutako zerbitzari horretatik igorriko dute informazioa, baina Mastodon sareak eskaintzen dituen bide guztietatik jarraitu ahal izango da, eta hedabidearekiko elkarrekintza abiatu, beste ezein saretan bezala.
Tokikomeko presidente Iban Arantzabalek nabarmendu du sare sozial nagusiek erabiltzaileen kalterako eraginak dituztela, eta "gero eta beharrezkoagoa dela jarduera soziala kontrolpeko plataformetan egitea". Tokiko hedabideek informazioaren kalitatea bermatzeko eta erabiltzaileen segurtasuna hobetzeko pausoak emango dituztela aurreratu du. Elkartea sinetsita dago "beste era bateko sare sozialak posible direla: irekiak, algoritmorik gabeak eta zentroa komunikazioan jarrita, eta ez etekin ekonomikoan".
Hori dela eta, Tokikomek sare komertzialak utzi eta fedibertsora salto egitera animatzen du publikoa, "epe ertainera guztiontzako mundu hobea" egiten lagunduko duelakoan".