Makroproiekturik ez! Lurra defenda dezagun lelo, milaka manifestari batu dira larunbatean Gasteizen proiektu fotovoltaiko eta eolikoen egitasmo handien kontra. Bilbo plazatik abiatuta, UAGA sindikatua eta azpiegitura handien kontrako hogei bat plataforma izan dira manifestazio jendetsuan. Deitzaileen arabera, "biodibertsitatearen suntsipena eta lur eta larreen desagerpena" areagotuko dute proiektu hauek.
Araba Bizirik plataformak egindako aldarrien artean, lurraldeko makroproiektu guztiak "geldiaraztea", lurralde antolakuntza egitasmo bat abiatzea, eta "lurraldearekin espekulatzeari uztea" eskatzen dute. Honen aurrean, beste energia eredu mota batzuen aldeko apustua egin dute: autokontsumorako energia berriztagarriak. "Jarreraz aldatzeko garaiz zaudete. Bestela, Arabako espoliazioaren zuzeneko arduradunak izango zarete".
