Sektoreko eragileekin hitz egin ondoren, ikasturte honetako hasieran eskola garraioko ibilbide guztiak martxan jarriko direla iragarri du Begoña Pedrosa Hezkuntza sailburuak. Guztira 128 ibilbide izango dira Araban, 194 Bizkaian, eta 91 Gipuzkoan. Pedrosak eskerrak eman dizkie garraio konpainiei "akordioa lortzeko jarreragatik" eta "Hezkuntza Sailarekin lanean jarraitzeagatik".
Neurri honekin eskola garraioak iaz eduki zituen arazoak konponduta utzi izan nahi ditu Eusko Jaurlaritzak. 2023/2024 ikasturteko lehen egunean Araba eta Bizkaiko 10.000 ikasle inguru eskola garraiorik gabe gelditu ziren, garraio konpainien eta Eusko Jaurlaritzaren arteko tirabiren ondorioz. Jauraritzak eskainitako ibilbide asko ez zituzten bete konpainiek, eta Arabako zerbitzuen %80 baino gehiago bertan behera geratu ziren. Aurten, aldiz, udan zehar hartutako akordioek 2024/2025 ikasturterako zerbitzua bermatuta utziko dute.