Gorbeialdekoen ondoren, Amurrioko Udalak eta bere kontzejuek ere iragarri dute alegazioak aurkeztu dituztela Zierbena proiektuaren kontra. Halaber, Gasteizko Kontzejuen Elkarteak iragarri du alegazioak aurkeztuko dituela multinazionalen proiektu fotovoltaikoak gelditzeko.
Amurrioko Udalak, Lezamako Administrazio Batzarrarekin, Baranbioko Administrazio Batzarrarekin eta Larrinbeko Administrazio Batzarrarekin lankidetzan alegazioak aurkeztu ditu Arabako Industria Administrazioaren Lurralde Ordezkaritzan, Solariako energia sortzeko proiektuari dagokionez, ebakuazio azpiegituren trazadurak zuzenean eragiten baitie. Zehaztu dutenez, alegazio horiek eguzki-planta fotovoltaikoak (2-3-4) Zierbena 400 azpiestazioan aurreikusitako punturaino husteko azpiegiturek udalerriari eragindako afekzioei buruzkoak dira.
Aurkeztutako alegazioek zalantzan jartzen dituzte Solariak aurkeztutako ingurumen-inpaktuaren azterlanaren hainbat alderdi. Udalaren eta administrazio batzarren arabera, azterlan horrek berriki onartutako Hiri Antolamenduko Plan Orokorraren (HAPO) zehaztapenak urratzen ditu, eta, zenbait kasutan, eragin larria du udalerriko ingurumenean.
Gainera, ebakuazio-azpiegiturak beste proiektu fotovoltaiko edo eoliko batzuetarako balio dezakeela uste dute Amurrioko instituzioek, horien kokalekuak oraindik ezagutzen ez badira ere. "Hala balitz, eta garraio sarearen korapilo berean sartzeko eta konektatzeko baimenak dituenez, ingurumen-azterketa bateratua egin beharko litzateke, lurraldeko elkarreraginak ebaluatzeko", esan dute.
Aurkeztutako alegazioak ebatzi ondoren, Amurrioko Udalak berriro aztertuko du, eragindako administrazio batzarrekin batera, horri buruzko ekimen berriak hartzea.
"Neurria eman"
Bestalde, ACOVI Gasteizko Kontzejuen Elkarteak iragarri berri du Eusko Jaurlaritzaren aurrean izapidetzen ari dela udalerri horretako planta fotovoltaikoen proiektuei (Vitoria Solar 1, Vitoria Solar 2 eta Solaria Zierbena Solar 2, Solaria Zierbena Solar 3 eta Solaria Zierbena Solar 4) buruzko alegazioen txostenak. ACOVIren eta udalerri horretako kontzejuen artean egin eta adostutakoak dira alegazioak, bai plaka fotovoltaikoen inguruan zein horiei lotutako ebakuazio-azpiegiturei buruzkoak. Azpimarratu dutenez, Gasteizko udalerriko kontzeju gehienek, kontzeju horiei babesa adierazteko, bat egin dute txosten horiekin.
Elkarteak azaldu duenez, gaur egun, hiru kontzejutan dute eragin larria multinazionalen asmoek, kontzejuaren %40ko okupazioa suposatzen dutelako eta etxetik 500 metrora baino gutxiagora kokatu nahi dituztelako instalazioak, "Lurralde Antolamendu Plana bera bete gabe". Azaldu dutenez, alegazio horiekin bat egin du Gasteizko Udalak hirigintza eta ingurumen arloan aurkeztutako txostenak.
"Gasteizko Udalari, Arabako Foru Aldundiari eta Eusko Jaurlaritzari eskatzen diegu Arabak merezi duen mailan egon daitezela eta makro proiektu horien aurrean landa eremua defenda dezatela". Era berean, aldez aurreko baimenen izapidetzea gelditzeko eskatu du ACOAk, energia berriztagarrien LAParen behin betiko onarpena izan arte, "aldez aurretik eztabaidatuta eta inplikatutako eragileen parte-hartzearekin", esan dute.
