Ramiro Gonzalez diputatu nagusiak osoko bilkuran erantzun beharreko galderak atzeratu ditu urrira arte. EH Bilduk eta PPk erabakia gaitzetsi dute, osasun zentroen aldaketek "azalpen" bat behar dutela eta urrian "beranduegi" dela adieraziz. Izan ere, lau hilabeteko atzerapena izango litzateke.
"Ahaldun Nagusia arazo handi baten aurrean ezkutatzen ari da", salatu du Iñaki Oiartzabal Arabako PPren buruak. Bestalde, EH Bilduk gogorarazi du ekainaren 4an egindako galderei ez diela erantzun aldundiak. "Galdetu nahi genion zer iritzi zuen murrizketa horiei buruz eta, batez ere, jakin nahi genuen ea Osakidetzako arduradunen batekin bildu zen Arabako gizartearen osasunerako eskubidea defendatzeko", jakinarazi du Eva Lopez de Arroyabe alderdiko bozeramaileak.
Mediku gabe herrian
Udan izan ohi diren mediku errefortzurik gabe geratuko dira Arabako zenbait osasun zentro, Osakidetzak ekainean hartutako neurrien ondorioz. Udalerri batzuen anbulatorioek murrizketen ondorioak nabaritzen hasi dira; kasurako, Mañuetan, eta beste hainbeste espero da Artziniegan eta Luiaondon.
Bastidako udalak ere salatu du udan behar dituen mediku errefortzurik gabe geratuko dela. 1.606 biztanle erroldatuta dituen arren, uztail eta abuztuan 10.000 biztanle izatera igarotzen dela gogora ekarri du. Osatu berri den Jaurlaritzako Osasun Sailari eskatu diote "neurriak hartzeko", justifikaziorik gabeko erabakian" atzera egin eta "oinarrizko zerbitzua" ziurtatzeko.
