Ekainaren 28a da, sexu eta genero disidentzien eguna, eta Euskal Herri osoan zehar LGTB komunitatearen aldarriek beteko dituzte kaleak. Gasteizen ere manifestazioa izango da arratsaldean, 20:30ean, Andre Maria Zuriaren plazatik abiatuta, Apur dezagun Zistema, Stop Pink Washing lelopean.
E28 Gasteizko Koordinadorak antolatu du mobilizazioa. Bertan hartzen dute parte EHGAM Euskal Herriko sexu askapenerako mugimenduak, Gasteizko Bilgune Feministak, Zirriborroak Kultur elkarteak, Miaukatuz kirol klubak eta Lumagorri Heteroarauaren aurkako taldeak. Manifestazioaren ostean Gasteizko Gaztetxera hurbiltzeko deia egin du Koordinadorak, Berba Labanakaz taldearen kontzertua izango da bertan eta K-kota del Norteren pintxada ondoren.
Pinkwashingaren aurka
Ekainean enpresa eta erakunde ugari betetzen dira ortzadar kolorez, LGTB komunitatearen alde. Baina urteetan zehar salatu izan dute Euskal Herriko zein munduko sexu-genero disidenteek ez dutela onartzen LGTB auzia erabiltzea inoren "aurpegi garbiketa" egiteko.
Aurten garrantzia berezia hartu du pinwashingaren auziak, Palestinako genozidioaren harira. Izan ere, nazioartean politikari ugarik erabili dute LGTB auzia Israelen alde egiteko, eta kritika ugari jaso ditu auziak, baita EHGAMen partetik ere. "Ez dizuegu utziko gure borrokaren koloreak genozidioa zuritzeko erabiltzen" adierazi dute Aleara bidalitako iritzi artikuluan. Gainera, Israelen sexu bereko pertsonen ezkontzak ez daude baimenduta.
First Pride was a Riot
55 urte bete dira gaur Stonewalleko altxamendua gertatu zenetik New Yorken, LGTB eskubideen aldeko mugimendu garaikidearen abiapuntu gisa hartu ohi den momentua. Stonewall Inn tabernan Poliziak egindako sarekada bati erantzunez protesta jendetsuak eta istilu handiak izan ziren Polizia eta matxinatutako pertsonen artean. LGTB harrotasuna aldarrikatzen da ordutik ekainaren 28an, eta mundu mailako aitortza du Stonewalleko altxamenduak. Hala ere, Euskal Herriko LGTB eragile ugarik gogorarazten dute urtero borrokarako eguna dela ekainaren 28a, izan ere, "lehen harrotasun eguna matxinada bat izan zen".