Araban euskararen erabilera ikertzeko Henrike Knörr 2023 ikerketa saria esleitu gabe geratuko da edizio honetan. Beka emateko hautagaitzak baloratzeko sortutako batzordeak aho batez erabaki du aurkeztutako proiektu bakarrak ez duela betetzen deialdiaren oinarrietan adierazitakoa. Ondorioz, 2023ko edizioa esleitu gabe uztea erabaki du.
Gidor Bilbao, Iñaki Martinez de Luna eta Gema Lasarte adituek osatutako epaimahaiak iazko abenduan hartu zuen erabakia, eta gaur ezagutarazi da ebazpena Arabako Aldizkari Ofizialean.
Aldundiak eta Euskal Herriko Unibertsitateak bultzatuta, sariak 4.000 euroko gehieneko zuzkidura du. Lehenengo edizioan bi beka eman zizkieten Mikel Perez eta Iker Ondartzari, Gasteizko gazte elebidunen hizkuntza eta Arabako euskalkia aztertzeko, hurrenez hurren. Bigarren edizioan Mikel Gartziari eta Anne Egañari eman zieten. Gartziari, hizkuntza sinesmenak eta haur eta lehen hezkuntzako irakasleen jarrerak aztertzeko. Egañari, Gasteizko guraso euskaldunen artean familia hizkuntza politikak aztertzeko.