Arabako Errioxako Ardoaren Ibilbideak, Eusko Jaurlaritzaren babesarekin, aurkeztu berri duen Rioja Alavesa WIP Wine Important Person marka komertzialaren kontra errekurtsoa aurkeztu du Errioxa Jatorri Izendapenak, Europako Batasuneko Jabetza Intelektualaren Bulegoaren (EUIPO) aurrean.
Aspalditik dator Arabako Errioxa izenaren "jabetzaren" inguruko tirabira.
Arabako Errioxako Ardoaren Ibilbideak blogriojaalavesa.eus blogean argitaratu duen ohar batean azaldu du, 2022ko urrian, Rioja Alavesa WIP marka berria aurkeztu zuela, Europako Batasuneko Jabetza Intelektualaren Bulegoaren (EUIPO) aurrean. Eskaera horretan izenaren erregistroa eskatzen dute, bi epigrafetan erabiltzeko. Epigrafe horietan ez da ezertarako aipatzen ardo hitza, Errioxako Kontseilu Arautzailearen trabak saihesteko.
Hala ere, 2023ko otsailaren 2an, Errioxa sor-markaren kontseiluak Rioja Alavesa WIP markaren produktu eta zerbitzu guztien erregistroaren aurkako oposizioa aurkeztu zuen, hau da, erregistro ororen aurka, ez bakarrik ardoa egiteko, baizik eta sustatzeko eta merkaturatzeko erabileraren aurka. 2023ko uztailean (bost hilabete geroago), Errioxa sor-markako kontseiluak Arabako Errioxako Ardoaren Ibilbideari jakinarazi zion marka berriaren aurka zegoela.
Aurrera egin dute
Halere, joan den azaroaren 2an, elkarteko zuzendaritza batzordeak Errioxako Kontseilu Arautzailearen oposizioa "bertan behera uztea, eta marka izapidetzen jarraitzea" erabaki zuen. Hala, urriaren 27an, Arabako Errioxako Ardoaren Ibilbideak marka berria aurkeztu zuen komunikabideen aurrean, Madrilen. Ondoren, etxean egin dute aurkezpena, azaroaren 16an, Paganosko Eguren Ugarte upategietan egin zen Enoturismoko XIII. Foroan; Bilbon ere aurkeztu dute astearte honetan; eta Bartzelonan 2024ko lehen hiruhilekoan aurkeztuko dute, ziurrenik martxoan.
Elkarteak adierazi duenez, Arabako Errioxa apartekoa egiten dituzten balioak nabarmendu nahi dituzte lelo berriarekin: "ardoa, lurraldea eta pertsonak". Bestalde, eskualdean ibili diren informazio batzuen aurrean, Arabako Errioxako Ardoaren Ibilbideak argitu du elkartearen izena hasieratik ondo erregistratuta duela, eta "ez dagoela arriskuan".
Araba eta Errioxa arteko tirabira
Aspalditik dator Arabako Errioxa izenaren "jabetzaren" inguruko tirabira. Errioxa izendapenak, Toloñoko mendilerrotik Ebro ibaira doan eskualdeari erreparatzen dion marka erregistratu zuen duela 20 urte, hura Espainian ustiatzeko. Eta, 2017an, Arabako Errioxa marka Europako Patente eta Marken Bulegoan erregistratu zuen, Europan ere marka hori ustiatzeko Errioxa sor-markak nahi eran, merchandising-erako, alkoholik gabeko edarietarako oro har, eta ardoaz besteko edari alkoholdunetarako.
2019aren urrian, berriz, Arabako Errioxa izena "berreskuratzen" saiatuko zela hitz eman zuen Arabako Diputazioak. "Arabako eta arabarren ondasuna dena haien esku egon dadin lanean gaude etengabe", esan zuen Batzar Nagusietan Ramiro Gonzalez ahaldun nagusiak, EH Bilduk egindako salaketaren harira. "Euskal erakundeetan ezin dugu ulertu Errioxako izendapenak eskubide hori beretzat hartu izana. Erakunde hori bere eskuduntzetatik harago joan da ardoaren sustapen eta salmenta arloetan", esan zuen Gonzalezek.
Aurten, berriro ere hitz eman du Arabako Diputazioak: "Erreklamazio formal bat aurkezten ari gara erakunde eskudunen aurrean, Arabako eskualde bati izena ematen dion esklusibotasun hori lehengoratzeko. Denbora daramagu horretan lanean, ikerketa dago atzean eta gure erreklamazioa ondo antolatzeko beharrezkoak diren azken datuak biltzen ari gara".
Bitartean, Arabako Mahastiak sor-markako behin behineko lehendakari eta ABRAko idazkari Emilio Agillok blogriojaalavesa.eus blogean eskatu du argitzeko zergatik euskal administrazioek ez duten "ezer egin" Errioxako Kontseiluaren kontra.