Edorta Lamo sukaldariak itxi du gaur Añanako gatzaren uzta, eta, ekitaldi horretan, Ramiro Gonzalez diputatu nagusiak Gatz Haraneko enbaxadore izateko aitorpena eman dio.
Sukaldariak "pribilegiotzat" jo du "munduko gatzaga aktibo zaharrenak dituen lurreko kide izatea". Goraipatu du gatz horrek ematen duen "txispa gastronomikoa", eta erantsi du txispa horren barruan ere sartzen direla kultura eta historia.
Lamok Oñatiko Goi Mailako Ostalaritza Eskolan sukaldaritza ikasi zuen, eta bere ibilbide profesionalean zehar New Yorken, Gasteizen, Granadan eta Donostian ibili da. Ibilbide horretan, hainbat sari jaso ditu. 2018ko abenduan ARREA! jatetxea ireki zuen Santikurutze Kanpezun.
Gaurko ekitaldian, Añanako Gatz Harana Fundazioko zuzendari Pablo de Oraak ezagutarazi du aurten 22 tona gatz lore eta beste 150 tona iturburuko gatz ekoitzi direla.
