Udal eta foru hauteskundeak ospatzen ari dira gaur Espainiako Estatuan, baita Araban, Bizkaian, Gipuzkoan eta Nafarroan ere. Espainiako zonalde gehienetan ez bezala, EAEko hiru herrialdeetan parte-hartzea jaitsi da. EAE osoan parte-hartzea duela lau urte baino %4,07 baxuagoa izan da, boto-emaileen %48,71k bozkatu baitu; 2019an, ordu berean, parte-hartzea %52,78koa zen.
Udal hauteskundeen parte-hartzearen inguruko azken datuak 18:00ak aldera iritsi dira, eta, oraingoz, Araban %46,54koa izan da parte-hartzea; 2019ko hauteskundeetan baino %2,94 baxuagoa (orduan %49,48koa zen ordu berean) eta EAEko hiru probintzien artean baxuena. Hiriburuari dagokionez, Gasteizen duela lau urtekoa baino txikiagoa da parte-hartzea, %47,32tik %44,29ra (-%3,03).
Hala ere, Arabako udalerri batzuetan igo da parte-hartzea 2019ko hauteskundeekin alderatuta, bereziki Lautadan eta Arabako Errioxan: Agurain (+%2,35), Dulantzi (+%2,96), Arraia-Maeztu (+%0,70), Arratzua-Ubarrundia (+%6,54), Kripan (+%3,06), Kuartango (+%6,42), Bastida (+%0,38), Guardia (+%2,33), Lapuebla de Labarca (+%4,57), Moreda (+%7,27), Samaniego (+%10,91), Villabuena (+%2,27) eta Zalduondo (+%8,05).
Trebiñuko bi udalerriei dagokionez: Argantzongo parte-hartzea %56koa da, 2019an baino %1,72 baxuagoa; Trebiñukoa, berriz, %50koa, duela lau urte baino %1,64 baxuagoa.
Hautetsontziak ixteko ordubete inguru falta da momentu honetan. Kontsultatu Arabako udalerri guztietako parte-hartzearen inguruko datuak hemen.