Udal eta foru hauteskundeak ospatzen ari dira gaur Espainiako Estatuan, baita Araban, Bizkaian, Gipuzkoan eta Nafarroan ere. Espainiako zonalde gehienetan ez bezala, EAEko hiru herrialdeetan parte-hartzea jaitsi da. EAE osoan parte-hartzea duela lau urte baino %1,86 baxuagoa izan da, boto-emaileen %35,3ak bozkatu baitu.
Lehen datuak 14:00ak aldera iritsi dira, eta oraingoz Araban %33,76koa izan da parte-hartzea; 2019ko hauteskundeetan baino %0,93 baxuagoa eta EAEko hiru probintzien artean baxuena. Hiriburuari dagokionez, Gasteizen duela lau urtekoa baino txikiagoa da parte-hartzea, %33,19tik %32,31ra jaitsi baita.
Aldea ez da oso nabarmena izan, eta goizeko eguraldi ona izan daiteke parte-hartze baxuaren arrazoietako bat. Hautetsontziak ixteko bost ordu baino gutxiago falta dira, eta arratsaldean ikusiko da parte-hartzea igotzen den ala ez.