Urtean 1.792 orduko lanaldia. 1.104 euroko soldata gordina. Baldintza horietan lan egin daiteke? Baldintza horietan zaindu daiteke? Arabako egoitza pribatuetako eta etxebizitza komunitarioetako langileek bi eguneko greba egin dute aste honetan, asteartean eta asteazkenean, "bizimodu duina bermatzeko" lehen hitzarmen probintziala eskatzeko. Greba deitu duten ELA eta LAB sindikatuek "patronalaren blokeoa" amaitzea exijitu dute.
Bi greba egunen "jarraipen nabarmena" azpimarratu dute sindikatuek, batez ere sektoreko gutxieneko zerbitzuak kontuan hartuta: gutxieneko zerbitzuak %70ekoak dira gerokultoreen eta erizaintzako laguntzaileen artean, eta %50ekoa EUD osasun langileen eta teknikarien artean.
Gaur, bigarren greba egunean, elkarretaratzea egin dute 11:00etan Babesgabetuen plazan, beren egoera gizarteratzeko. Ondoren, 12:30ean, manifestazioa egin dute plazatik abiatuta. Erdialdeko kaleak zeharkatu dituzte, eta Babesgabetuen plazara itzuli dira, baina lehenago 20 minutuko eserialdia egin dute Independentzia kalea eta Bake kalea gurutzatzen diren puntuan, tranbia eta errepidea moztuz.
GAUR GREBA EGUNA DA ARABAKO ERRESIDENTZIA PRIBATUETAN✊🏽
— Zurrumurru Askea (@ZurrumurruAskea) May 24, 2023
ARABAKO LANGILEEK HITZARMEN "ESTATALA" DUTE
HAU DA👇🏼
⏭️1792h
⏭️1.104 € (soldata gordina)
EZIN DA HORRELAKO LAN-BALDINTZEKIN BIZI 🤬
EZIN DA PREKARIZATZEN DUEN SISTEMA HAU SOSTENGATU‼️ pic.twitter.com/PVuzm4ko5w
Hemen bideoa👇🏽
— ELA Gasteiz (@ELAGasteiz_) May 24, 2023
ERRESIDENTZIAK BORROKAN‼️@ELAsindikatua @ElaFeminista pic.twitter.com/mwP3RXsEQ5
JO TA KE
— ELA Gasteiz (@ELAGasteiz_) May 24, 2023
IRABAZI ARTE ‼️
"Nuestros mayores merecen un respeto,
nuestras trabajadoras merecen un respeto."
ERRESIDENTZIAK BORROKAN🔥 pic.twitter.com/IvcCXusdxQ
Soldata "irrigarria" eta lanaldia "astakeria"
Maiatzaren 15ean izan zuten azken negoziazio mahaia, eta patronalaren azken eskaintza 2028. urterako 1.350 euroko soldata —"irrigarria", sindikatuen ustez— eta urteko 1.742 orduko lanaldia —"astakeria", sindikatuen hitzetan— izan zen: "Gaur egun patronalak oraindik ez digu erantzun sindikatuok mahai gainean jarritako proposamen ekonomikoari, eta horrek agerian uzten digu negoziatzeko duen jarrera eskasa", kritikatu dute langileen ordezkariek.
Azaldu dutenez, Arabako adinekoen egoitza pribatuetako zein etxebizitza komunitarioetako langileek "lan karga handiekin" jarraitzen dute: "Lanarengatik sortutako gero eta gaitz gehiagorekin, urteko lanaldi oso luzeekin, eta gero eta zailagoa egiten zaie hilabete amaierara iristea; hau da, lan egiteko bizi dira, eta bizirauteko lan egiten dute", ohartarazi dute sindikatuek.
Sektore feminizatu eta arrazializatu honek lau urte baino gehiago daramatza borrokan, langileen lan baldintza duinak jasoko dituen hitzarmen propio bat eskatzen. Besteak beste, "hilaren amaierara iritsi ahal izateko" soldata igoerak eta lanaldiaren murrizketa eskatzen ari dira, "bizi baldintza materialak hobetzeko".
"Zaintza publikoak, ez negozioa"
Zainketen sektoreko langileen lana "eskertzeko eta baloratzeko premia" aldarrikatu dute ELAk eta LABek: "Funtsezko sektorea da, non emakume horiek adinekoen bizitzari eusten lan egiten duten. Beren lan baldintzak behar bezala arautzea eskatzen dugu".
Patronalari negoziatzeko dei egitearekin batera, Gizarte Politiketako Saileko diputatu Emilio Sola interpelatu dute, sektoreak hitzarmen probintziala izatearen garrantzia mahai gainean jar dezan: "Zaintzak publikoak izan behar dira eta ez negozioa. Irabaziak lehenesten dituena negozioa da, eta ez zaintza", salatu dute.
