Arabako SOS Arrazakeriak jakitera eman duenez, gizon batek gorroto delituen aurkako salaketa aurkeztu du Arabako Probintzia Fiskaltzan, joan den apirilaren 21ean jazotako "gertakari arrazista" batengatik. Gasteizko La Comarca pubean beste lagun batekin ilara egiten ari zen, biak jatorri afrikarrekoak, eta ezingo zutela sartu esan zien bertako atezainak, ordu erdi itxaron eta gero. "Mespretxuz eta isekaz jakinarazi zigun ilaran gehiago ez itxaroteko, ezingo genuela sartu", adierazi du egindako salaketan.
Azaldutakoaren arabera, ez da taberna horretako atezainek "modu iraingarrian" tratatzen duten lehen aldia, eta berriz ere jarrera hori ikusirik, erreklamazio-orri bat eskatu zuen. Orduan, establezimenduko arduraduna tabernatik atera zen eta ukatu egin zion, "modu umiliagarri eta mehatxagarrian oihuka". Azkenean, erreklamazio-orria eman zioten, baina jabeak Ertzaintzari deitu zion. Poliziak salatzailea identifikatu zuen, deitu zuen pertsonaren arabera "mozkortuta zegoelako eta ilara salto egin nahi zuelako". Eraso arrazista salatzen duen pertsonak ukatu egiten du hori, eta alkoholik edaten ez duela dio: "Han zeuden pertsonek berretsi egin dezakete, baina ez zitzaien deklaraziorik hartu".
Salatzaileak dioenez, hurrengo egunean, Lakuako Ertzaintzaren komisarian gertakariak ez salatzeko gomendatu zioten. "Halako salaketek ez dutela inongo ibilbiderik esan zidaten, zaila izango zelako frogatzea ez zidatela uzten sartu beltza izateagatik". Gaineratu du, ez dakiela Ertzainek azkenik kanpoan zeuden lekukoei deklaraziorik hartu ote zieten eta atestatua itxi duten.