Etxerat euskal preso eta iheslarien senide eta lagunen elkarteak asteazken honetan jakitera eman duenez, Oier Urrutia Gonzalez Txime preso gasteiztarra aske gelditu da, zigorra osorik beteta.
2009ko apirilaren 5ean espetxeratu zuten Urrutia, eta Auzitegi Nazionalak 14 urteko zigorra ezarri zion, "erakunde terroristako" kide izatea eta "armak eta munizioak gordetzea" egotzita. Besteak beste, A Lama (Pontevedra), Navalcarnero (Madril), Daroca (Zaragoza) eta Logroñoko espetxeetan bete zuen espetxealdia.
Hamaika urte preso igaro ostean, 2020ko uztailean hirugarren gradua onartu zioten gasteiztarrari, Logroñoko espetxeko Batzordeak proposatu eta gero. Horrekin batera, Espainiako Gobernuko espetxe arloko erakundeak Zaballako espetxera lekualdatu zuen. Handik hilabete batzuetara, 2020ko abenduan, baldintzapean aske gelditu zen.
Ordurako, Urrutiak zigor osoaren zatirik handiena beteta zuen dagoeneko —hiru laurdenak beteta 2019ko irailetik—, eta euskal presoen artean hirugarren gradura igaro zen lehenetako bat izan zen. Espetxe-legeriaren bidez egindako prozesu aitzindari horren ostean, asko izan dira gradu progresioa lortu duten EPPKko presoak, eta bide horretan aurrera egiten jarraitzen dute gaur egun ere. Joan den astean, dispertsio politikaren amaiera ospatu zuten Sare Herritarrak eta Etxerat Elkarteak.
Orain, 2023an, 14 urteko zigorra osorik beteta, erabateko askatasunera itzuli da.
