Euskal Herriko Basque Country Itzuliak bere 62. edizioaren irteerak eta helmugak ezagutzera eman zituen abenduan. Joan den astean, berriz, txirrindularitza lasterketaren aurkezpen ofiziala egin zuen OCETA elkarteak. Aste Santuarekin batera, apirilaren 3tik 8ra, sei etapa izango ditu Itzuliak.
Hilaren 3an, lehenengo etapa Arabatik igaroko da, Gasteizen hasi eta Bastidan (Arabako Errioxa) amaituta. 165,4 kilometroko etapa izango da, eta, besteak beste, Opakua mendatea igoko dute txirrindulariek, mendiko lehen maillota lehiatzeko. Ondoren, errepide estuak eta oso bihurgunetsuak izango dira: Maeztu, Bernedo, Urizaharra, Ocio, Bastida, Eltziego, Guardia eta Samaniegotik igaroko da tropela, berriz ere Bastidara itzuli eta esprintean bukatzeko.
IBILBIDEA
MAPA
Bigarren etapak Viana eta Leitza lotuko ditu, eta Nafarroatik ibiliko da osorik. Hirugarren etapa Gipuzkoan hasi eta bukatuko da, Errenteriatik Amasa-Villabonaraino. Ondoren, Bizkaira igaroko da lasterketa, hurrengo bi etapak bertan jokatzeko: laugarren jardunaldiaren irteera eta helmuga Santurtzin izango dira; bosgarrena, berriz, Zornotzan hasi eta bukatuko da. Azken etapa, aurreko urteetan bezala, Eibar ingurutik ibiliko da, herri armagilean hasi eta bukatzeko.
- 1. Etapa. Apirilak 3, astelehena: Gasteiz - Bastida
- 2. Etapa. Apirilak 4, asteartea: Viana - Leitza
- 3. Etapa. Apirilak 5, asteazkena: Errenteria - Villabona
- 4. Etapa. Apirilak 6, osteguna: Santurtzi - Santurtzi
- 5. Etapa. Apirilak 7, ostirala: Zornotza - Zornotza
- 6. Etapa. Apirilak 8, larunbata: Eibar - Eibar
