"Aldaketa garrantzitsu bat behar dugu, dramarik gabeko aldaketa bat. Gure ustez, UAGA izan behar da Arabako nekazaritzaren eta abeltzaintzaren sektoreko erreferentziazko ahotsa". Edurne Basterra aguraindarra buru duen hautagaitzak modu horretan aurkeztu du bere burua sindikatuaren zuzendaritzako bozketetarako. Basterrarekin batera, Jon Moraza, Nagore Ruiz de Zarate, Gorka Barredo, Jesus Bauza, Itxaso Compañon, Iker Agirre eta Asier Fernandez de Jauregi nekazariek osatzen dute zerrenda.
Egungo zuzendaritzaren ildoa, berriz, Berantevillako Javier Briñasek ordezkatuko du, orain arte UAGAko erremolatxaren sektoreko arduraduna eta gaurko zuzendaritzako kidea. Unai Campo egungo lehendakariordeak kargu horretan jarraituko luke, baita Elvira Aldai eta Txema Lopez de Abetxuko batzordekideek ere. Amaia Martinez, Adolfo Estavillo eta Jose Martinez Pascual ere daude Briñasen zerrendan.
Hauteskundeak hurrengo martxoaren 19an egingo dira, Gasteizko Europa Biltzar Jauregian, eta horretan Arabako nekazarien eta abeltzainen sindikatuak dituen 1.100 afiliatuek hurrengo lau urteetarako zuzendaritza eta lan ildoak aukeratuko dituzte. Zortzi urtez lehendakaritzan egon ostean, Javier Torrek kargua utziko du.
