2019an Mendixurren egindako ehiza uxaldi bati buruz Ekologistak Martxan taldeak eta foru funtzionario batek egindako salaketak berretsi ditu gaur Elkarrekin Podemos-IU batzarkide taldeak, eta aurreratu du astelehenean "erantzukizun politikoak" eskatuko dizkiotela Jose Antonio Galera Ingurumen diputatuari.
Koalizioak ezagutarazi duenez, atzo salaketa horien gaineko erantzuna jaso zuten Arabako Diputazioko Ingurumen eta Nekazaritza sailen partetik, eta bertan aldundiak ez die aurkeztu babestutako gune batean ehiza uxaldi bat justifikatuko lukeen txostenik. Hortaz, koalizioaren arabera "uxaldia baimendu zen Mendixur eremu babestuarekin muga egiten duen barrutiaren esleipendunak egindako eskaera soilagatik".
Halako gune batean uxaldi bat justifikatzeko nekazaritza lurretan kalteak egon beharko lirateke, edo bestelako kalteak gainerako faunan edo ekosisteman. Halakorik ez dagoela azaldu du Jose Damian Garcia-Moreno batzarkideak. Erantsi du babestutako gune batean egindako uxaldi hori "apeta" soilagatik onartu zela, eta aurreratu du ez dela kasu bakarra. Araban egiten den ehizaren kudeaketan "irregulartasunetan oinarritutako modus operandi bat" dagoela salatu du.
Ohar batean koalizioak gogoratu du basurdeen ehiza hori onartu zela "hainbat kontserbazio-figura dituen eremu batean", hala nola Faunaren Babeslekua, Hegaztientzako Babes Bereziko Eremua, Kontserbazio Bereziko Eremua eta Nazioarteko Garrantzia duen RAMSAR hezegunea.
