Jarraipena

Elurrak zurituta esnatu da Araba

Espero zen bezala, elurra gogor hasi du 04:30etik aurrera, Arabako bazter guztiak zurituz. Larrialdi plan guztiek martxan jarraitzen dute, eta 17:30ean itxita daude Azazeta, Opakua, Gasteiz, Herrera, Urduña, Altube eta Las Txozasko mendateak.

Azken eguneratzea: Urtarrilak 18, asteazkena, 17:20

Orain bai, negua heldu da. Aurreikuspen meteorologikoen arabera, elur kota 600 edo 700 metroren bueltan ibiliko zen asteartean zehar, eta gauean kota hori 400 eta 200 metro bitartera jaitsi zitekeen. Uste baino lehenago, eguerdi partean, elurra iritsi zen Arabako eskualde batzuetara, baita Gasteizera ere; hala ere, prezipitazioak txikiak izan ziren.

Asteazken goizaldean, berriz, 04:30ak aldera, elurra gogor erortzen hasi da Araba osoan zehar, eta Gasteiz 05:00ak aldera zuritzen hasi da. Landa eremuan eta errepideetan hiriburuan baino eragin handiagoa izan du elurrak orain arte, baina datozen orduetan prezipitazioak mantenduko direla espero da, tenperatura baxuekin (-1ºC eta 3º bitartean).

Euskalmeten arabera, bihar, ostegunean, elur-kota igotzen joango da goizean zehar, eguerdirako 600-800 metroko altuerara iritsi arte, eta arratsaldean zehar 1.200-1.500 metro ingurura igoko da. Josu Erkoreka Segurtasun sailburuak ohartarazi duenez, gaur arratsaldean elurra egingo du berriro, eta arriskua bihartik aurrera desagertuko da. Hala ere, ordutik aurrera euria, kazkabarra, desizoztea eta uholde arriskua iritsiko dira.

BIDEOAK

GERTAKARIAK

  • SOS Deiak Araban erregistratutako intzidentziak:
    • Ur-putzuak errepidean: 0
    • Eroritako zuhaitzak: 2
    • Elurra edo izotza errepidean: 39
  • Goizean zehar: Gasteiz eta Bilbo arteko hainbat autobus zerbitzu bertan behera geratu dira.
  • 13:30: Elurra indarrez itzuli da Gasteizera, eguerdian zehar berriz ere Arabako eskualde gehienetara zabaldu ostean.
  • 11:35: Kamioi batek istripua izan du A-1 errepideko 368. kilometroan, Barrundia parean, Madrilgo noranzkoan. Errei bat itxita eta 2 kilometroko auto-ilarak. 12:20an errei guztiak daude zabalik.
  • 10:45: Gamarrako parkea itxita egongo dela jakinarazi du Gasteizko Udalak, prebentzio neurri gisa.
  • 10:30: Atzerapenak Forondako aireportuko hainbat hegalditan, goizeko lehen orduan.
  • 09:40: Elurra itzuli da Gasteizera, goizaldeko prezipitazioen ostean atseden txiki bat eman ostean.
  • 08:20: Auto-ilarak Bilborako autobian (N-622) Altuberako noranzkoan, Zigoitia parean, matxuratutako kamioi baten ondorioz. 09:30ean ez zen auto-ilararik erregistratzen.

LARRIALDI PLANAK

EAE

Araban, Bizkaian eta Gipuzkoan, Eusko Jaurlaritzak Neguko Bidezaintza Planaren fase operatiboa aktibatuko du 13:00etatik aurrera. EAE osoan elurragatiko abisu horia aktibatuta zegoen astearteko 09:00etatik aurrera; gaur, asteazkenean, alerta laranjara pasatu da, elurra 200 eta 400 metro bitartera iritsi daitekeelako; alerta laranjari eutsiko zaio ostegunean ere, 00:00etatik 09:00etara:

  • Prebentzio moduan, zazpi garabi astun izango dira errepide sare nagusian, gurutzatuta gera litezkeen kamioiak erretiratuko direla ziurtatzeko.
  • Baliabide gehiago kudeaketa gelan eta telefono bidezko arretan, bai 011n (Trafikoa) bai 112an (Larrialdiak), eta gidariei beharrezko informazioa emango zaie, besteak beste, mezu aldakorreko panelen, webgunearen, sare sozialen eta beste hainbat baliabideren bitartez.
ARABA

Halaber, Arabako Foru Aldundiak larrialdi fasea aktibatu zuen astelehenean, eta honako baliabideak aurreikusi ditu, besteak beste:

  • 57 langile mobilizatuta.
  • Elurra kentzeko 21 makina.
  • Miñoien bi patruila.
GASTEIZ

Gasteizko Udalak Elurteen Planeko 1. larrialdi fasea aktibatu du, baliabide propioak zein kanpoko baliabideak mobilizatzeko:

  • Elurra kentzeko zazpi makina egongo dira alerta egoeran, hiriguneko bide nagusiak garbitzeko.
  • Landa eremuan, berriz, beste hamaika makina egongo dira inguru horiek garbitzeko prest.
  • Galtzadetan esku hartzeko dispositiboaz gain, espaloiak garbitzeko ekipoak ere martxan izango dira.
  • Erabilera publikoko gatz zakuak banatzeko prozesua abian da: astelehenean, hiriko 35 puntutan jartzen hasi ziren, gizarte etxe, zerbitzu publiko eta eraikin komertzialen alboan eta beste hainbat eremutan.

Horrez gain, Udalak herritarrei zuzendutako gomendio sorta bat plazaratu du, garbiketan laguntzeko, oinez joateko edo kotxez bidaiatzeko.

Aldundiak alerta ezarri du lurraldeko errepide ugaritan elurragatik eta izotzagatik. Bestalde, asteazkeneko 17:30ean, kateak beharrezkoak dira hainbat errepidetan zirkulatzeko, eta zazpi mendate itxita daude:

  • Azazeta
  • Opakua
  • Gasteiz
  • Herrera
  • Urduña
  • Altube
  • Las Txozas

Iturria: araba.eus

Kontsultatu Gasteizko trafiko kamerak minutuz minutu hemen.

Bestalde, Eusko Jaurlaritzako Segurtasun Sailaren kameren bitartez, lurraldeko errepide nagusien unean uneko egoera ikusteko aukera dago:

OHARRA: Posible da kamera batzuen seinalea galtzea zenbait unetan. Iturria: trafikoa.eus

Erlazionatuak

Lehen elur malutak ailegatu dira Arabara

Araba

Astearte eguerdian, aurreikusitakoa baino ordu batzuk lehenago, elurra hasi du Araban; eta hiriburura ere 14:00ak aldera iritsi dira lehen elur mal...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide