Ania Saenz de Buruaga ilustratzaileak bidea egiten jarraitzen du, pausoz pauso. ALEAren egutegi-urtekariaren azalaren diseinua egiteaz gain, aste honetan bertan erakusketa oso bat aurkeztu du La Casa Amarilla arte galerian. De Norte a Sur bildumaren inaugurazioa ostegun honetan egin dute, eta otsailaren 5era arte ikusi ahal izango da Malagako Santos kaleko 7. zenbakian kokatutako espazioan.
Artistaren beraren hitzetan, Arte eta Kultura Garaikidearen Zentrorako prestatutako erakusketa honek "batzen gaituzten, lotzen gaituzten, sufriarazten eta maitarazten gaituzten, eta, dirudienez, denetik eta ezerezetik lotuta eta bereizita mantentzen gaituzten harien harremana erakusten digu". Saenz de Buruagaren marrazkiek hausnarketa batera garamatzate: "Errealitatea ikusarazten digute, eta nahi duguna egiten ari garen ala enpatia prekarioko pertsona bihurtzen gaituen agindu orokorrari jarraitzen diogun pentsarazten digute".
"Introspekzioa, autoezagutza eta onarpena" dira artista gasteiztarrak aurkitzen dituenak marrazten duenean, eta horrek, aldi berean, aukera ematen dio "emozioei buruz hausnartzeko, eta bizi garen gizartearekin harremana nolakoa den ulertzen saiatzeko".
