gauzatu da Mercedeseko hauteskunde sindikaletan. Seigarren gauaren aurkako eta KPIaren araberako soldata igoeren aldeko greba eta mobilizazioak bultzatu zituzten sindikatuek (ELA, LAB eta ESK) enpresa batzordearen gehiengoa eskuratu dute, lau ordezkari gehiago lortuta. ELA sindikatuak, UGTrekin orain arte partekatutako nagusitasuna erabat bereganatzeaz gain, bi ordezkari gehiago lortu ditu.
Hitzarmena sinatzearen alde agertu ziren sindikatuen blokeak (UGT, CCOO, Ekintza eta PIM), berriz, plantillaren zigorra jaso eta sei ordezkari galdu ditu, batzordearen gutxiengoa bilakatuz. UGT sindikatuaren hondoratzea suposatzen du horrek, EAEn kontrolatzen zuen enpresa handi bakarra galduta; hala ere, kolpetik libratu den sindikatu bakarra CCOO izan da, bere lau ordezkariak mantenduz.
2018ko emaitzekin alderatuta, honakoak izan da bilakaera:
- Euskal sindikatuen blokea: 14 (2018) - 18 (2022)
- ELA: 7 (2018) - 9 (2022) / 1.049 boto (%26)
- LAB: 4 (2018) - 5 (2022)
- ESK: 3 (2018) - 4 (2022)
- Hitzarmenaren aldeko blokea: 17 (2018) - 11 (2022)
- UGT: 7 (2018) - 6 (2022) / 688 boto
- CCOO: 4 (2018) - 4 (2022)
- Ekintza: 3 (2018) - 1 (2022)
- PIM: 3 (2018) - 0 (2022)
Guztira 29 ordezkarik osatuko dute langileen batzordea datozen lau urteetan. 2018tik orain arte, 31 izan dira, baina plantillaren murrizketaren ondorioz, ordezkarien kopurua ere murriztu dute: asteazken gauetik ostegun iluntzera arte, 4.783 langile zeuden hautetsontzietara deituta. 4.188 boto zenbatu ziren, %87,56ko partaidetzarekin.
Nolanahi ere, bloke aldaketa iritsi bada ere, uztailean (600 botoren aldearekin) onartu eta sinatutako hitzarmena 2026ra arte izango da indarrean. Bitartean, Emilio Titos zuzendariak erretiroa hartuko du laster, eta zuzendaritza berria iritsiko da. Ikusi beharko da horrek zer eragin duen Arabako fabrikarik handienaren lan harremanetan.
