Akordioa lortu dute Detesan, ia hilabeteko grebaren ostean

Detesako langileen elkarretaratzea. / Argazkia: ELA

Gamarrako Detesako 55 langileen gehiengoak baiezkoa eman dio ELA sindikatuak enpresarekin lortutako akordioari. Enpresaren lehen hitzarmenak lanaldiaren murrizketa eta soldaten igoera ekarriko ditu, besteak beste.

KPIaren araberako soldata igoerak, lan baldintzen hobekuntzak, prekarietatearekin amaitzeko neurriak eta enpresan eskala bikoitzik ez egotea. Hitzarmen berriaren negoziazioei begirako aldarrikapen horien inguruan, duela ia hilabete bat grebari ekin zioten Gamarrako industrialdean kokatutako Detesa enpresako langileek.

Ia hilabete greban eman ostean, Detesako 55 langileen gehiengoak baiezkoa eman dio ELA sindikatuaren eta enpresaren artean erdietsitako akordioari. Joan den ostiralean, azaroaren 18an, bozkatu zuten, langileen asanblada batean.

Hortaz, greba bertan behera geldituko da astelehen honetatik aurrera, eta enpresak hitzarmen kolektiboa izango du lehen aldiz, 2022, 2023 eta 2024 urteetarako; orain arte enpresa akordioen bitartez arautzen baitziren lan baldintzak. Hitzarmenaren bidez, hainbat hobekuntza lortu dituzte, hala nola: urteko lanaldiaren murrizketa, 1.735 ordutatik 1.724 ordutara; soldata igoera lineal kontsolidatuak hitzarmenaren iraunaldi guztirako (1.200 euro lehen urtean, 1.000 euro bigarrenean, eta 600 euro hirugarrenean); baita inaplikazio klausula ere.

ELA sindikatuak prozesuaren balorazio "positiboa" egin du: "Behin-behineko langileen ehunekoa oso handia zen enpresan, eta, hala ere, grebalariek duintasunez erantzun dute, plantilla osoaren lan baldintzak hobetuko dituen hitzarmen kolektiboa erdietsiz. Babes hori ezean, nekezagoa litzateke emaitza", ospatu dute.

Detesak automobilgintzarako estanpazioaren sektorean dihardu, eta Rubi enpresa taldearen parte da.

Erlazionatuak

Detesako langileek hiru aste daramatzate greban

Gasteiz

Ostiral honetan, Detesa enpresako langileek hiru aste bete dituzte greban. KPIaren araberako soldata igoerak eskatzeaz gain, salatu dute enpresak g...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide