Asteburu honetan, Ipar Euskal Herrian jokatutako mundialean, Maite Ortiz de Mendibil gasteiztarrak (Andetxa, 2005) eta Eneritz Lizardi mutrikuarrak osatutako bikoteak Arai Lejardi eta Ihart Arakistainen bikotea garaitu zuen finalean, 15-10 eta 15-14 emaitzekin. Hortaz, emozioz beteriko finala eskuratuta, munduko txapeldun bilakatu zen arabarraren bikotea.
"Hau bonba bat da", adierazi zuen Ortiz de Mendibilek partidaren ostean, 17 urterekin lortutako urrearekin hunkituta. "Orain, udan lan asko egin ondoren, gozatzea tokatzen da. Nire familiari eskaintzen diot garaipena".
Arabarrak eta mutrikuarrak Espainia A selekzioa ordezkatu dute lehiaketan. Lehen partidan, garaipena nagusitasun handiz lortu zuten Frantziaren aurka; ondoren, Mexiko B eta Mexiko A taldeen kontra lehiatu ziren final-laurdenean eta finalerdian, Espainia B taldearen aurkako finalera iritsi aurretik.
Espainiako taldeek 20 domina lortu dituzte txapelketan: bederatzi urre, bederatzi zilar eta bi brontze. Bigarren postuan, Frantziak 17 domina eskuratu ditu: bost urre, lau zilar eta zortzi brontze. Hirugarrenik, Mexikok 9 metal lortu ditu: hiru urre, bi zilar eta lau brontze.