Joan den astean Arabako ALEA aldizkariko orrialdeetara ekarri genuen Elsa Ullmann eta Garazi Beramendi gazte gasteiztarrek sortu berri duten egitasmoa: Forniqueer, betiko karta-sortari hordagoa.
Karta-sorta tradizionala hankaz gora jarrita, eta hainbat kolektiboren ekarpenari esker, askotariko objektu eta pertsonaiak asmatu dituzte, karta-sorta transfeminista bat martxan jartzeko: ohiko ezpata, urre, kopa eta bastoia alde batera utzi, eta kondoia, usta, hileko-kopa edo artaziak erabili dituzte, baita LGTB kolektiboko pertsonaiak, Talka espazio feministari keinua eta ezkutuan gordetako beste hainbat mezu ere.
Hala ere, proiektuak polemika piztu du, eta hainbat kolektibo abolizionistaren kritikak jaso ditu: "Gasteizko Udaleko Berdintasun Zerbitzuak diru publikoarekin lagundu du karta-sorta hau, besteak beste, emakume baten gorputz mutatua erakusten duena. Naipes Fournierrek ez zuen proiektu honetan parte hartu nahi izan", idatzi du igande honetan Araba Abolizionista elkarteak, bere sare sozialetan.
El servicio de igualdad @VG_berdintasuna de @vitoriagasteiz ha subvencionado con dinero público una baraja de cartas que muestra, entre otras imágenes, el cuerpo mutado de una mujer. @NaipesFournier no quiso formar parte de este proyecto. pic.twitter.com/2oGbrdxaD5
— Araba Abolizionista #LOASPseráLey (@Arabolizionista) July 3, 2022
Enpresak berak komunikatu bat plazaratu du astelehen honetan, "egun hauetan jasotako galdera eta iruzkinen" harira. Enpresa Forniqueer karta-sortaren proiektutik "erabat kanpo" dagoela eta inoiz ez duela parte hartu azaldu du Fournierrek.
"Karta-sorta honen merkaturatzearen berri izan genuenean, gure eskaera bakarra Forniqueerrek erabilitako logoa aldatzea izan zen, baimenik gabe gure marka erregistratua erabiltzen zuenez kontsumitzailea karten jatorriaz nahastu zezakeelako. Horri dagokionez, karta-sorta horren arduradunek eskatutako aldaketa egin zuten, eta logo hori zuen karta kenduko zutela adierazi ziguten, tipografiak eta izenak gure markari egiten baitzioten erreferentzia. Proiektua ez zuten kontsultatu gure enpresarekin, ez garapenari dagokionez, ezta diseinuari eta fabrikazioari dagokienez ere", azaldu du Fournierrek.
Comunicado en relación a la baraja de @VG_berdintasuna de @vitoriagasteiz: pic.twitter.com/SFsaderkP0
— Naipes Fournier (@NaipesFournier) July 4, 2022
