Igande honetan amaitu da Italiako Giroa, Veronako erlojupeko azken etaparen ostean. Jai Hindley (Bora-Hansgrohe) australiarrak irabazi du aurtengo txapelketa, baina podiumean ordezkaritza arabarra bermatu du Mikel Landak (Bahrein Victorious), hirugarren postua lortuta; bigarren postua, berriz, Richard Carapaz (Ineos Grenadiers) ekuadortarrak lortu du.
Horrela, txirrindulari murgiarrak burua altxatu du berriz ere iazko erorikotik urtebetera. Hala ere, larunbatean Hindley-rekiko 50 segundo galdu zituen Landak Marmoladako etapa handian. Sailkapen orokorrean azkenean bigarren postua lortu ez badu ere, eta aurten etaparik irabazi ez duen arren, 2015ean lortutako hirugarren postua berreskuratu du, zazpi urte beranduago.