Korrikaren hasierako ajeak ez du festa geldituko Amurrion. Izan ere, 2022ko Arabako Bertsolari Txapelketak bertan egingo du lehen geldialdia, ostiralean. Behin hasiera emanda, datozen bi asteburuetan lehen fasea jokatuko da, bost saiotan, bost herritan: Amurrio, Guardia, Trebiñu, Legutio eta Langraiz Okan izango dira norgehiagokak.
Lehen fase honetako bost saioetan hiru epaile arituko dira: Egoitz Iradier, Ekaitz Elorriaga eta Manex Garaio.
Amurrio
Amurrion apirilaren 1ean, ostiralean, abiatuko da Txapelketa, 20:00etan hasiko den lehenengo final zortzirenarekin. Amurrion kantatuko duten bertsolariak hurrengoak izango dira:
- Aitor Najera Saez de Vicuña - Zalduondo
- Eukene De los Aires Amundarain - Gasteiz
- Iñaki Viñaspre Simon - Abetxuku
- Paula Amilburu Izargarai - Aramaio
- Unai Anda Delika - Ametzaga
- Xabier Antia Zuaznabar - Gasteiz
Gai emailea Nieves del Alamo Gil izango da.
Kantatuko duten bertsolarien artean aipatzekoa da 2019ko edizioko txapelduna Iñaki Viñaspre dela. Aitor Najera, Eukene De los Aires eta Xabier Antiak lehen aldiz kantatuko dute Txapelketa honetan. Eukene De los Aires 2020 eta 2021eko Arabako bertsolari gaztetxoen Eskolarteko txapeldunordea izan da. Unai Anda eta Iñaki Viñaspre 2021eko Arabako Binakako Bertsolari Txapelketako finalista bikote izan dira.
Guardia
Guardian, apirilaren 2an, larunbatean, bigarren final zortzirena izango da, 17:30ean. Kantatuko duten bertsolariak hurrengoak izango dira:
- Aitor Ugarte Eriz - Aramaio
- Ander Aranburu Amenabarro - Gasteiz
- Asier Otamendi Alkorta - Urretxu
- Manex Agirre Arriolabengoa - Aramaio
- Manuel Bendala Garcia-Donas - Sevilla-Gasteiz
- Unai Gomez Garde - Izarra
Gai emailea Arantxa Sobrino Lasa izango da.
Kantatuko duten bertsolarien artean aipatzekoa da Asier Otamendik Arabako Txapelketako lau txapel dituela eta Prudentzio sariketako bost txapel. Manex Agirrek Arabako Txapelketako bi txapel ditu, eta 2021eko Arabako Binakako Bertsolari Txapelketako txapelduna izan da Martin Abarrategirekin batera, eta Arabako Kuadrillartekoan hirutan izan da txapeldunen taldekoa. Manu Bendala 2021eko Arabako Binakako Bertsolari Txapelketako finalista izan da Oihane Perearekin batera. Ander Aranburu eta Unai Gomezek lehen aldiz kantatuko dute Txapelketa honetan.
Trebiñu
Trebiñun, apirilaren 3an, igandean, hirugarren final zortzirena izango da, 17:30ean. Kantatuko duten bertsolariak hurrengoak izango dira:
- Andere Arriolabengoa Bengoa - Aramaio
- Asier Rubio Hidalgo - Luiaondo
- Danel Herrarte Nafarrate - Aramaio
- Irati Anda Villanueva - Gasteiz
- Oier Arbina Vadillo - Agurain
- Xabi Igoa Eriz - Aramaio
Gai emailea Lierni Altuna Ugarte izango da.
Kantatuko duten bertsolarien artean aipatzekoa da Xabi Igoa Arabako Txapelketako azken hiru edizioetako finalista izan dela, eta Arabako Kuadrilla arteko bi ediziotan talde txapelduneko kide izan dela. Andere Arriolabengoa Arabako Kuadrilla arteko hiru ediziotan talde txapelduneko kide izan da. Danel Herrarte 2020ko Arabako Kuadrilla arteko Izenbakuek talde txapelduneko kide izan da, eta lehen aldiz kantatuko du Txapelketa honetan. Oier Arbina 2012ko Arabako Kuadrilla arteko Aguriango Sorginetxe talde txapelduneko kide izan da.
Sarrerak
Saioetarako sarrerak Bertsosarrerak.eus webgunean daude salgai, eta egunean bertan saioa hasi baino ordu erdi lehenago ere eskuratzeko aukera izango da, aretoko edukiera bete arte. Bazkideek 2 euro ordaindu beharko dituzte, sarrera arruntak 3 euroko prezioa izango du, eta 16 urtetik beherakoentzat dohainik izango da.
Txapelketan parte hartzen duten 30 bertsolariek behin baino ez dute kantatuko fase honetan, saioko garailea zuzenean sailkatuko da hurrengo fasera, eta gainontzekoak faseko puntu metaketaren arabera sailkatuko dira final laurdenetara; guztira, 18 bertsolari igaroko dira.
