Paquita Saenz de Urturik gaur goizean jaso du AAI Arkeologiarako Arabar Institutuak emandako Enrique Eguren saria. Arabako Batzar Nagusietako presidente Pedro Elosegik eman dizkio lurraldeko arkeologoen esker ona adierazten duten diploma eta eskultura.
Diploma horretan jaso dute sariaren muina. "Zure irudiak zure ibilbide guztian zehar transmititutako baloreak erakusten dizkigu. Araban gaur egun ezagutzen dugun arkeologia profesionalaren garapenak barnebiltzen du. Gure lurralde historikoko ondare arkeologikoa babesteko eta gizarteratzeko egin dituzun lanak erabakigarriak izan dira Arabako gizarteak aintzat har ditzan".
AAIk bi urtean behin ematen duten saria da gaur ospatu dutena. Iazko urtearen amaieran ezagutarazi bazuten ere, osasun egoera zela eta, atzeratzea erabaki zuten. AAIko presidente Rafa Varonek ALEAri azaldu zionez, aurten "merezi duen moduko omenaldia egin ahal izatea" espero zuten, "arkeologo guztien etxea den Arkeologia Museoan". Gaur izan da egun hori.
Saenz de Urturi 1969an hasi zen arkeologiaren munduan, Dulantziko Castro de Henaio herrixkan. Arabako arkeologian urte gehien daramatzan ikertzaileetako bat da. Gasteizko Mariturri eta Arkaia aztarnategietan, Lermandako Legardagutxi herri hustuan, Gasteizko eta Guardiako hirigune historikoetan edo Gaubeako Castros de Lastra aztarnategietan lan egin du, besteak beste.
