Honako hauek dira Covid-19aren pandemiak azken egunetan EAEn izandako bilakaera kezkagarriaren aurrean LABIk adostu dituen neurri nagusiak. Iñigo Urkullu lehendakariak azaldu duenez, ostegunean, hilaren 22an, sartuko dira indarrean:
- Jarduera guztiak 1:00etan amaituko dira: ostalaritzan, merkataritzan, kulturan eta sektore guztietan.
- Edukiera gehiago mugatzea ostalaritza zein merkataritza establezimenduetan eta ekitaldietan; gehienez %35ekoa izango da (neurri hau astelehenean, hilaren 26an, sartuko da indarrean eta ez die eragingo dagoeneko kontratatutako ekitaldiei):
-
1.600 pertsona arteko edukiera duten espazioak: gehienez 400 pertsona; kanpoaldean 600.
-
1.600 eta 5.000 bitarteko edukiera duten espazioak: gehienez 600 pertsona; kanpoaldean 800.
-
5.000 pertsonatik gorako edukiera duten espazioak: gehienez %20ko edukiera.
-
- Hiriguneetan maskara derrigorrezkoa izango da, baita aire zabalean ere, segurtasun distantzia mantendu ezin daitekeen kasuetan. Ostalaritzan, jateko edo edateko unea izango da salbuespen bakarra; eta kirolean, aire zabaleko jarduera fisikoan, hondartzetan eta igerilekuetan ere ez da nahitaezkoa izango. Praktikan, azken hilabetean bezala.
Gaurko lehen orduetan zenbait hedabidek zabaldutako neurri polemikoena —gazteen mugikortasuna mugatzea— baztertu egin du LABIk. Halaber, "berme juridiko faltaren" ondorioz, etxeratze agindua berreskuratzeari ere uko egin dio.
Hala ere, arlo horretako neurriak gogortu ez diren arren, gaueko mugikortasuna zein jende pilaketak saihesteko dei egin du lehendakariak. Besteak beste, 1:00etatik 6:00etara bitarteko "borondatezko etxeratze agindua" proposatu du.
Oraingoz, hurrengo LABIren bileraren hitzordua ez zehaztea erabaki dute, eta egoera "egunez egun" aztertuko dutela azaldu du Iñigo Urkulluk.
Azken egunetan, datuak etengabe okertu dira EAEn eta Araban. Gure lurraldean 204 positibo berri atzeman dira azken 24 orduetan, eta intzidentzia 534koa da dagoeneko. Gaur bertan, gainera, pandemia osoko errekorrak hautsi dira: 1.801 positibo berri atzeman dira EAEn, horietako 1.078 Bizkaian.
