Koronabirusa

12 eta 15 urte bitarteko gazteen txertaketa gaur aktibatuko du Osakidetzak

Nerabeek Osakidetzaren webgunearen bitartez eskatu ahal izango dute hitzordua. / IREKIA

Asteazkenetik aurrera, 12 eta 15 urte bitarteko gazteek txertaketarako hitzordua hartzeko aukera izango dute. Bitartean, Urkullu lehendakariak etxeratze agindua eta maskaren erabilera berreskuratzea eskatu dio Espainiako Gobernuari.

Eusko Jaurlaritzako gobernu kontseiluaren bileraren ostean, Osasun sailburu Gotzone Sagarduik txertaketa kanpainaren hurrengo urratsa iragarri du: asteazkenetik aurrera, 12 eta 15 urte bitarteko nerabeek txertoa jasotzeko hitzordua hartzeko aukera izango dute. Azaldu duenez, Pfizer eta Moderna txertoak jasoko dituzte gazte horiek.

Egunotan 16 eta 29 urte bitarteko adin tartera zabaldu da txertaketa. Muga hori jaistea eta 12 urtetik gorako gazte guztiak txertatzeari ekitea erabaki du Eusko Jaurlaritzak, ikasturte hasierarako txertaketa prozesua osatuago egon dadin.

Horretarako, orain arte bezala, gazte horiek Osakidetzaren webgunearen bitartez eskatu ahal izango dute hitzordua. Sailburuak azpimarratu duenez, ireki berri den adin tarte horretan oraindik badira hitzordu libreak, besteak beste, oporrak edo udako olatuak gazteen artean eragindako kutsatzeak direla eta.

Lehendakariaren eskaera

Araba eremu gorrira itzuli den eta Covid-19 positibo kopuruak gazteen artean gora egin duen aste berean, Iñigo Urkullu lehendakariak etxeratze agindua eta maskaren erabilera berreskuratzea eskatu dio Espainiako presidente Pedro Sanchezi, gutun bidez. Idazkian, "premiazko neurriak segurtasun juridikoarekin" hartzeko eskatu dio.

Azken egunetako datu txarren aurrean, astelehen honetan bildu da LABI teknikoa, pandemiaren bilakaera eta balizko neurri berriak aztertzeko. Ostegunean izango da LABIren aholku batzordearen bilera, eta litekeena da neurri murriztaileak berrikustea bertan; oraingoz, ordea, Eusko Jaurlaritzak ez du ezer aurreratu, ezta hedabide nagusiek ere.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide