Ministroen Kontseiluan onartu ostean, lege dekretu bat ezarriko da eta Espainiako Kongresuak uztailean baliozkotu beharko du. Nolanahi ere, Pedro Sanchezek aurreratu du ekainaren 26tik aurrera maskararen erabilerak derrigorrezkoa izateari utziko diola aire zabaleko espazioetan. "Aire zabaleko espazioetan maskara erabili beharko dugun azken asteburua izango da hau", ziurtatu du Sanchezek.
Erabakia azken asteetan aurreratzen joan da Espainiako Gobernua, eta pandemiaren datuen zein txertaketaren bilakaera ona kontuan hartuta egin du aurrera. Izan ere, Gobernuaren aurreikuspena da abuztuan Espainiako biztanleriaren %70 immunizatuta egotea.
Espazio itxietan edota segurtasun distantzia mantentzea ahalbidetzen ez duten zenbait espaziotan, maskara erabiltzeak derrigorrezkoa izaten jarraituko du. Hala ere, datorren ostegunean, Ministroen Kontseiluaren bilera egiten denean, xehetasun gehiago ezagutuko dira.
Arratsaldean, LABIren bilera
EAEri dagokionez, gaur arratsaldean, indarrean dauden neurriak arintzeko bilduko da LABI. Besteak beste, ostalaritzaren ordutegia 1:00etara edo 2:00etara atzeratzea, mahai bakoitzean sei pertsona egotea baimentzea edo elkarte gastronomikoen irekiera aztertuko dute.
