Milaka pertsona bildu dira asteburu honetan Bilbo, Donostia eta Gasteizko manifestazio jendetsuetan. ELA, LAB, CCOO, SATSE, STEILAS eta ESK sindikatuen deialdian, zerbitzu publikoak indartzea, enplegu publikoa sortzea eta EAEko sektore publikoko behin-behineko 60.000 langile baino gehiago kontsolidatzeko eskatu dute.
Sektore publiko osoaren mobilizazioen eta apirilaren 22ko greba egunaren ostean, sindikatuek salatu dute Eusko Jaurlaritzak, instituzioek eta alderdi politikoek ez dutela erantzunik eman "milaka langileek egindako eskaerei". Horren aurrean, azken egunetan hainbat bilera egin dituzte alderdi politikoekin. "Eusko Jaurlaritzari eta Eudeli ere bilera eskatu diegu, baina, tamalez, bilera horiek ezin izan dira egin; Eudelen kasuan bilera ukatua izan dela azpimarratu nahi dugu", kritikatu dute, jarrera hori "lotsagarria" dela salatuz.
Behin-behinekotasun altua
Sindikatuen arabera, "EAE Europako behin-behinekotasun ranking-aren lehen postuan dagoen bitartean, Eusko Jaurlaritzak pribatizazioaren aldeko apustuarekin jarraitzen du".
"Legebiltzarrean, Kidegoen eta Eskalen Lege Proiektuan barneratutako proposamen baten alde egiten jarraitzen du. Proposamen hori ez da nahikoa, eta behin-behinekotasunaren gaitza pairatzen duten langile gehienak bere aplikaziotik at uzten ditu. Ez Mahai Orokorrean, ez eta mahai sektorialetan ere, ez du enplegu publikoa kontsolidatzeko bidean aurrera egiteko borondaterik agertzen", salatu dute sindikatuek.
#Gasteiz
— LAB Gasteiz (@LABGasteiz) June 5, 2021
EAEko hiriburuetan mobilizatu gara, enplegu publikoa sortu eta behin behineko langileen kontsolidazioa eskatzeko#SORTUetaEGONKORTU#ZerbitzuPublikoenAlde#Kontsolidazioa#PribatizaziorikEz pic.twitter.com/ZgedAdL9iB