Martxoaren 8an, milaka emakumeren aurrean aurkeztu zuen abestia Gasteizen. Txalo eta oihu artean, "Poliziak ez nau zaintzen, nire lagunek bai" bertsoa Andre Maria Zuriaren plazako bazter guztietara iritsi zen, eta, azkenik, ikusgai dago bideoklipa. Abestiaren grabaketarako Ainhoa Galainen laguntza izan du.
"Emakumeok gure espazioa hartzen ari gara rap musikan", zioen Haizea Alonso urizahartarrak 2020ko apirilean, pandemiaren hasieran, ALEArekin izandako solasaldian. Zalantzarik gabe, urratsez urrats, horretan ari da Haizeatxo.
2019ko abenduan Nire Bala argitaratu zuen, dagoeneko 97.000 ikustaldi baino gehiago lortu dituen bideoklip arrakastatsua. Ondoren, 2020ko martxoan, Hitzak iritsi zen, ALEAren elkarrizketarako aitzaki paregabea. Irailean, Errekaleorrera jo zuen Petricor izeneko bideoklipa grabatzera. Eta, bitartean, astia izan du Dj X eta Ningrarekin batera Hala Bedi Sessions saio bat eskaintzeko zuzenean.