2020ko maiatzaren 8an, ertzain batek telefonoa kendu eta 300.000 euro arteko isun batekin mehatxu egin zion Hala Bediko kazetari bati, Talkaren desalojoaren berri ematen ari zela.
Azaroaren 23an, Hala Bedi hedabide arabarrak kereila bat aurkeztu zuen kazetariaren lana oztopatzen saiatu zen poliziaren kontra.
Lau hilabete beranduago, Arabako Justizia Auzitegiak auzia artxibatzea erabaki du, ikerketaren lehen fasean. Hala Bedik kritikatu duenez, epaitegiak ertzainaren deklarazioa baino ez du jaso, eta agentearen adierazpenetan oinarrituta, bere errugabetasuna frogatutzat eman du.
"Ez gaude ados epailearen ebazpenarekin, eta helegitea jarriko dugu", iragarri dute Arabako hedabide libreko kideek. Salatu dutenez, froga gisa aurkeztutako bideoa eta eskatutako lekukotza frogak ez dira aintzat hartu. "Ikerketa ez da serioa izan, oso desorekatua izan da eta ez du auzia argitu, poliziaren bertsioa ontzat ematera mugatu da", kritikatu dute.
"Ohikoa da poliziaren bertsioak gainerakoenak baino pisu gehiago izatea, baina ez litzateke hala izan beharko auzipetutako pertsona ertzaina bera denean", adierazi dute. Horrenbestez, helegite baten bidez, ikerketak aurrera jarraitu dezan eskatuko du Hala Bedik, "auzia modu orekatuagoan argitu dadin.
Jon Hidalgo Hala Bediko kazetariaren hitzak, epaitegian: