Galdutako altxorraren bila. Kalte konponezina gure ondarearentzat erakusketa inauguratu du Arabako Foru Aldundiaren Museo eta Arkeologia Zerbitzuak Bibat-Arkeologia Museoan, eta Objektu arkeologikoak ustekabean aurkitzea. Zer egin behar dut? izeneko eskuliburua argitaratu du. Asmoa da azken hilabeteetan hainbat udalerritan espoliazioarekin lotuta jazo diren gertakarien inguruan informatzea eta halako jarduerek eragiten duten "kalte larria" nabarmentzea. Halaber, Ana del Val Kultura eta Kirol foru diputatuak azaldu du herritarrak kontzientziatzeko eta inplikatzeko mekanismoak indartzen lagundu nahi dutela, "kultura ondarearen defentsan eta babesean".
Del Valek azaldu duenez, ondare arkeologikoaren kontra urtean salaketa bat jartzetik ia dozena bat salaketara igaro da 2020an, gehienak aztarnategi arkeologikoetan metal detektagailuak erabiltzeagatik. Museoen eta Arkeologiaren zerbitzuburua, Javier Fernandez Bordegaraik bere aldetik nabarmendu du euskal erkidegoan objektu arkeologikoak jabego publikoa direla, "guztion ondasuna da", eta horrenbestez erabat debekatuta dagoela aztarnategiak ez ezik lurraldeko edozein lursail arakatzea metal-detektagailuak erabiliz.
