Nafar hegoaldeko uzta eskutik eskura banatu eta urrats sendoak ematen ari da Errigora, elikadura burujabetza ardatz, kontsumitzaile eta ekoizleen arteko zubia auzolanean oinarrituta eraikitzeko.
Ildo horretan, kanpaina honen izenburua Plateretik baratzera izango da. Izan ere, "harago" joan nahi dute oraingoan: "Errigorak ekoizleentzat suposatzen duen bultzada baliatuz, kontsumitzaileek eta beren eskaerek ekoizpenean izan dezaketen eragina bideratu nahi dugu, eskaerei erantzun ahal diezaiegun", azaldu dute.
Halaber, ekoizpen ekologikoari bultzada ematen jarraituko dute, Nafar hegoaldeko baratzetako produktuak modu horretara ekoitziak izan daitezen bermatuz.
Nola egin eskaera?
Oraingoan, olioa bost litroko bidoietan banatuko dute, eta kontserbak hamabi ontziko sortetan; planteamendua urte osorako beste eskatzea da eta.
Eskaerak egiteko epea martxoaren 4tik 24ra izango da, eta aurten online besterik ezingo da egin, stock arazoak izango dituztela aurreikusi dutelako. Ordainketa behin edo bi txandatan egin ahal izango da, eta banaketa, Gasteizen, apirilaren 24ko asteburuan.