Koronabirusa

100 urtetik gorako arabarren txertaketa Santiagon, Lezan eta Laudion hasi da

Erredakzioa 2021ko ots. 24a, 10:00
Txertoa jasotzen hasi dira 100 urtetik gorako pertsonak. / IREKIA

Osakidetzak Covid-19aren aurkako txertaketa hasi du adineko pertsonen kolektiboan. Araban, Santiago eta Leza ospitaleak eta Laudioko osasun zentroa ezarri dira 100 urtetik gorako pertsonak txertatzeko gune gisa, asteazkenetik aurrera.

Covid-19aren aurkako txertaketa prozesuak jarraitzen du EAEn. Egoitzetako kolektiboaren immunizazioa burutu ostean, txertaketa aurrera doa Osakidetzako zein sare pribatuko osasun langileen eta eguneko zentro batzuetako profesionalen artean. Espainiako Gobernuaren protokoloak aurreikusten ez zuen arren, 55 urtetik beherako ertzainen txertaketa ere hasi zen joan den astean.

Aste honetan, berriz, Osakidetza adineko pertsonak txertatzen hasi da. 80 urtetik gorako pertsonen kolektiboa oso zabala da: adin tarte horretako 160.000 lagun baino gehiago daude Araban, Bizkaian eta Gipuzkoan.

Hori dela eta, txertoa adin tarteen arabera mailakatuko du Osasun Sailak, eta zaharrenetatik hasiko da: 100 urtetik gorako pertsonetatik, zehazki; 1.800 pertsona inguru daude adin tarte horretan.

25 txertaketa-gune

Ostiraletik, Osakidetza telefonoz harremanetan jartzen ari da 100 urtetik gorako pertsona horiekin, osasun-zentroen bidez, hitzordua planifikatzeko. Erreferentziazko txertaketa-puntuak ezarri dira, eta asmoa da Erakunde Sanitario Integratu bakoitzeko bi puntu egotea, momentuz.

Hitzordua jaso ondoren, ahal duten pertsonak txertaketa-gune horietara hurbilduko dira eta han jarriko zaie txertoa. Hala ere, zailtasunak dituzten edo ezin duten pertsonen kasuan, Osakidetza haien etxera hurbilduko da. "Ahal dela, txertaketa-guneetako aurrez aurreko txertaketa kudeatuko da, dosiak manipulatzea delikatua delako eta ezin delako bat bera ere alferrik galdu", azaldu du Osasun Sailak.

Gutxienez 25 txertaketa-gune izango lirateke EAE osoan, Osakidetzaren sareko osasun-zentroetan. Araban, Santiago eta Leza ospitaleak eta Laudioko osasun zentroa ezarri dira 100 urtetik gorako pertsonak txertatzeko gune gisa. Santiagon, gainera, pertsona horiei autoan bertan jarriko diete txertoa.

Sentsibilizazio kanpaina

Txertatu zaitez – Babestu nazazu lelopean, sentsibilizazio kanpaina bat abiatu dute Eusko Jaurlaritzak eta Osakidetzak, eta ideia hau helarazi nahi du: "Zeure burua babesten baduzu, besteak babesten ari zara, eta alderantziz". Halaber, Osasun Sailak prebentzio-neurriekin jarraitzeko beharra azpimarratu du; besteak beste, maskararekin babesten jarraitzea.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide