Sorpresa gutxi espero ziren ostiral honetan Batzar Nagusietan, eta, aurreikusi bezala, osoko bilkurak foru gobernuaren —EAJ eta PSE— eta oposizioaren —EH Bildu, PP eta Elkarrekin— arteko elkarrizketa falta irudikatu du. Gobernuko alderdiek aurrekontu proiektua hobetzeko proposamenik ez egitea leporatu diote oposizioari; oposizioko alderdiek, berriz, elkarrizketarako asmorik ez izatea egotzi diote gobernuari.
Oposizioak aurkeztutako zuzenketa partzial guztiei uko egin diote EAJk eta PSEk, gehiengo absolutua baliatuz; akats teknikoak zuzentzeko emendakinak baino ez dira aurrera atera.
Eta horrela, kontuak aldatzeko aukera handirik gabe —eta, izan ere, inolako aldaketarik gabe—, onetsi egin dira 2021erako aurrekontuak. Osoko bilkurak Lurralde Historikoko aurrekontuei buruzko foru-araua onartu du; aldeko 27 botorekin eta kontrako 23rekin. Beraz, Arabak 527,7 milioi euroko proiektu ekonomikoa izango du aurten.
Gobernuko bi alderdiek deitoratu dute oposizioaren proposamenek ez dutela "aurrekontua hobetzeko balio", eta "pandemiari arlo soziosanitarioan, ekonomikoan, kulturalean eta ingurumenean aurre egiteko" proiektua defendatu dute.
