Gaur zazpi urte bete dira Borja Lazaro gaztea Kolonbian desagertu zenetik. 2014ko urtarrilaren 7tik 8ra bitarteko gauean desagertu zen gasteiztarra, Cabo de la Velan (Kolonbia). Geroztik, familiak eta lagunek ez dute aurkitzeko itxaropena galdu, eta, horregatik, etengabe mobilizatzen jarraitzen dute, ikerketekin jarraitu dadin, zer gertatu zen argitu eta non dagoen jakin arte.
Borja Lazaro non den lokalizatzeko aukera guztiak agortu daitezen eskatu du Gorka Urtaran alkateak, eta nabarmendu ditu zazpi urte hauetan gaztea gogoratzeko familiak, lagunek eta herritarrek antolatu dituzten ekimenak. Aurten, pandemiagatik, familiak ez du elkarretaratzerik deitu, eta sare sozialetan gogoratuko dute. "Familiak eta lagunak hemen jarraitzen dugu eta bilatzen jarraitzen dugu". Egun hauetan argitaratzen ari diren oroitzapen-mezuak jarraitu eta partekatzera animatu ditu Udalak herritarrak.
