Gazta arabarrek arrakasta lortu dute Euskal Herriko Gazta Txapelketan

Erredakzioa 2020ko urr. 12a, 10:28

Euskal Herriko Idiazabal Artzai Gazta Txapelketaren XXXVII. edizioan, hiru gazta onenak arabarrak izan dira: Ilarduiako La Leze, Galarretako Azkarra eta Patxi Lopez de Uralderen Larreako Gazta.

Igande honetan, XXXVII. Euskal Herriko Artzai Gazta Txapelketa ospatu da Idiazabalgo frontoian; Araba, Bizkaia, Gipuzkoa eta Nafarroako lurraldekako lehiaketetan sailkatutako gazta onenak parte hartu dute.

Idiazabal Jatorri Izendapeneko dastatzaileez gain, Joseba Argiñanok, Rafa Gorrotxategik, Luken Vigo sukaldariak eta Artzai Gaztaren hainbat artzain-elaboratzaile bazkidek parte hartu dute 32 gazten dastaketan.

Hiru gazta onenak arabarrak dira: Ilarduiako La Leze gaztategiko La Leze gaztak irabazi du lehenengo saria; bigarrena, Galarretako Azkarra gaztategiak lortu du, eta, azkenik, hirugarrena Patxi Lopez Uralderen Larreako Gazta gaztategiak lortu du.

Jose Mari Uztarrozi omenaldia

Idiazabal Jatorri Izendapeneko lehendakari Jose Mari Uztarroz sari-banaketan egon da, eta omenaldi hunkigarria egin diote, "bere bizitza osoa baserri munduarekin eta horren balioekin, artzainekin, ardi latxarekin eta Idiazabal gaztarekin konprometituta egoteagatik".

Covid-19a dela eta, aurten ezin izan da ospatu Txapelketarekin batera egin ohi den Idiazabalgo Baserritarren Eguna. Baina artzainek euren lana eta ilusioa beste urte batzuetan bezainbeste edo gehiago transmititzeko aukera izan dute, segurtasun neurri guztiak, distantziak eta protokoloak errespetatuz.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide